PHILTA humihingi ng exemption para kay Eala sa China Open

Naghain ng kahilingan ang Philippine Tennis Association (PHILTA) sa WTA para kay Alexandra Eala na ma-exempt sa mandatory China Open upang makapaglaro ang world number 18 para sa Pilipinas sa Asian Games.

Si Eala, na naging paborito ng mga tennis fan matapos talunin ang ilan sa mga malalaking pangalan sa circuit, kabilang sina Iga Swiatek at Coco Gauff, ang pinakamataas ang ranggo sa women's singles draw ng Asian Games na magsisimula sa Sabado at magtatapos sa Oktubre 4.

Gayunman, nagkakasabay ang iskedyul ng Aichi-Nagoya Games at ng mandatory WTA 1000 tournament na China Open, na magsisimula sa Beijing sa Setyembre 30.

May katapat na penalty sa ranking ang hindi paglahok sa isang mandatory WTA 1000 tournament nang walang opisyal na exemption at maaari ring patawan ng multa.

“Pormal kaming humiling ng exemption at iginagalang namin ang proseso ng WTA. Kasabay nito, nagpasya si Alex na katawanin ang Pilipinas sa Asian Games, at buong-buo namin siyang sinusuportahan (We have formally requested an exemption and we respect the WTA’s process. At the same time, Alex has made her decision to represent the Philippines at the Asian Games, and we fully support her),” ayon kay PHILTA Secretary General John Rey Tiangco sa pahayag sa media nitong Martes.

Humingi naman ang Reuters ng pahayag sa WTA tungkol dito.

Ngayong linggo lang, umatras sa Asian Games ang Indonesian tennis player na si Janice Tjen matapos hindi makakuha ng exemption para sa China Open.

Gayunman, lalahok pa rin si Eala sa Asian Games anuman ang maging desisyon ng WTA, ayon kay Philippine Olympic Committee President Abraham Tolentino sa isang pahayag.

“May mga patakaran ang WTA at may mga penalty kapag nilabag ang mga ito. Pero pupunta si Alex sa Nagoya, para sa bandila at bayan (The WTA has its rules and breaking the rules has penalties. But Alex will be in Nagoya, for flag and country),” dagdag niya.