NBA: Shai Gilgeous-Alexander, pinangunahan ang Thunder sa panalo kontra Cavaliers sa pamamagitan ng malakas na second-half performance

Tinalo ng Oklahoma City Thunder ang Cleveland Cavaliers, 124-116, nitong Miyerkules, sa pangunguna ni Shai Gilgeous-Alexander na nagpakita ng mahusay na laro sa second half.

Nakumpleto ng Thunder ang back-to-back sweep kontra Cavaliers matapos din nilang talunin ang koponan sa Cleveland sa pamamagitan ng limang puntos nitong Lunes.

Hindi naging dikit ang laban sa pagkakataong ito, bagama't nakahabol ang Cavaliers sa mga huling minuto na nagpaliit ng agwat sa iskor.

Nanguna ang Thunder mula simula hanggang matapos ang laro at nakapagtayo ng kalamangan na umabot sa 25 puntos sa first half.

Nakontrol ng Oklahoma City ang laro matapos ang 25-7 run sa first quarter, kung saan nag-ambag ang rookie na si Bennett Stirtz ng walong puntos.

Pagsapit ng kalagitnaan ng second quarter, umabot na sa 50-25 ang kalamangan ng Thunder.

Nagawa ng Cleveland na pababain sa pitong puntos ang kanilang pagkakaiwan sa mga unang minuto ng second half, sa tulong ng mabilis na pitong puntos ni James Harden at isang basket ni Donovan Mitchell.

Ngunit matapos ang timeout ng Oklahoma City, si Gilgeous-Alexander na ang nanguna sa opensa ng Thunder.

Sa first half, mas nakatuon sa perimeter ang dalawang beses nang NBA Most Valuable Player (MVP), kung saan pito sa kaniyang 12 tira ay nagmula sa three-point range.

Pinasok ni Gilgeous-Alexander ang isang mid-range jumper upang maputol ang sunod-sunod na puntos ng Cleveland. Sinundan niya ito ng dalawang assist sa magkakasunod na opensa ng Thunder papasok sa basket, bago muling nakapuntos sa pamamagitan ng fadeaway jumper at step-back three-pointer.

Hindi na muling naibaba ng Cavaliers sa walong puntos ang kanilang pagkakaiwan hanggang sa huling minuto ng laro. Nakapagtala si Gilgeous-Alexander ng anim na free throw sa huling 41 segundo upang mapanatili ang kalamangan ng Thunder.

Nakapagtala siya ng limang three-pointers, isang tres na lamang mula sa kaniyang career high. Nagtapos siya na may 11 successful shots sa 26 na pagtatangka, kasama ang walong assists.

Kulang din siya ng isang puntos upang mapantayan ang 43 puntos na naitala niya noong Lunes sa Cleveland.

Bagama't wala pa rin sa lineup ng Thunder ang tatlo nilang starters na sina Jalen Williams, Chet Holmgren at Cason Wallace, nakabalik naman sa aksiyon ang mahalagang bench contributor na si Alex Caruso matapos lumiban sa tatlong laro dahil sa injury sa bukung-bukong.

Malaki ang naging papel ng depensa ni Caruso sa pagpigil ng Thunder sa Cavaliers na makapagtala lamang ng season-low na 43 porsiyentong shooting accuracy mula sa field.

Nag-ambag si Ajay Mitchell ng Oklahoma City ng 23 puntos, habang nagtala naman si Stirtz ng career-high na 16 puntos.

Nanguna si Donovan Mitchell para sa Cavaliers sa naitalang 27 puntos mula sa 17 attempts, kung saan 10 ang kaniyang naipasok. Nag-ambag naman si Harden ng 19 puntos, siyam na rebounds at anim na assists, habang nagtala si Evan Mobley ng 16 puntos at 10 rebounds.

Sa huling bahagi ng first quarter, nagtamo ng injury sa kanang tuhod ang Cleveland player na si Jarrett Allen matapos mabangga kay Jared McCain habang nagsasagawa ng screen. Hindi na nakabalik sa laro si Allen matapos umalis sa court. Wala siyang naitalang puntos sa loob ng pitong minutong paglalaro.

-Field Level Media/Reuters