Yassi Pressman, Kim Chiu, emosyonal matapos mapabilang sa MMFF ang kanilang pelikula

Hindi napigilan nina Yassi Pressman at Kim Chiu na maging emosyonal matapos opisyal na inanunsyo ng Metro Manila Film Festival (MMFF) noong Lunes, Oktubre 12, na kabilang ang kani-kanilang pelikulang “Little Hope” at “A Perfect Marriage” sa mga opisyal na kalahok sa festival ngayong taon.

Ilang sandali matapos ang anunsyo, nagbahagi si Yassi ng larawan ng kanyang sarili habang umiiyak, bilang pagpapahayag ng kanyang saya sa pagkakasama ng family drama film niya sa taunang film festival.

Bukod sa pagbibida sa “Little Hope,” nagsisilbi rin si Yassi, 31, bilang co-producer ng pelikula. Ito ang kanyang ikalawang proyekto bilang co-producer, kasunod ng game show na “Tubig to Handle.”

“Isa itong napakalaking panalangin na natupad,” panimula ni Yassi sa kanyang Facebook post.

“Maraming maraming salamat po sa lahat ng bumubuo ng MMFF at sa ating mga jurors sa pagtanggap sa Little Hope. Buong puso po naming binuo ang kwentong ito, at ngayon pa lang, napakalaking bagay na pong malaman na maibabahagi namin ito sa inyo ngayong Pasko.”

Ipinahayag din ng aktres at producer ang kanyang pagmamalaki sa mga nakasama niya sa pelikula, kabilang sina Pepe Herrera at Cailey Ayesha Magno, gayundin ang iba pang miyembro ng cast.

“Proud na proud po ako sa aming mga actors at sa bawat taong nagbigay ng oras, talento, at puso sa pelikulang ito. Sana po ay maramdaman ninyo ang pagmamahal na inilagay namin dito—at makapaghatid ang Little Hope ng liwanag, tawanan, at pag-asa sa inyong mga puso,” dagdag pa niya.

“Ang dami ko pong gustong sabihin, pero sa ngayon… salamat po. Sobrang salamat,” pagtatapos niya.

Nauna nang ibinahagi ni Yassi na ang “Little Hope” ay isang kuwentong kapwa nakaaantig at nakalulungkot tungkol sa isang batang lumalaban sa cancer.

Samantala, nagpahayag din si Kim ng kanyang pananabik at pasasalamat sa X matapos malaman na kabilang ang pelikula niyang “A Perfect Marriage” sa mga opisyal na kalahok sa MMFF 2026.

“Yung kaba ko, GRABE!! Naiyak talaga ako nung in-announce ni Ms. Laurice Guillen ang family drama category!” panimula niya.

Nagpasalamat din ang aktres at host sa mga organizer ng festival, sa direktor ng pelikula at sa production team sa pagbibigay sa kanya ng pagkakataong maging bahagi ng proyekto.

“My heart is so full of gratitude! Maraming, maraming salamat po sa MMFF 2026 and to @quantumfilms @attyjoji for giving me this beautiful opportunity. @danvillegas”

Ibinahagi rin ni Kim, 36, ang petsa ng pagpapalabas ng pelikula at kinumpirmang mapapanood ito sa mga sinehan sa mismong Araw ng Pasko.

“#APerfectMarriage this December 25 na po!! For better or for worse, MAGKASAMA TAYO!”

Sa huling bahagi ng kanyang post, nagpasalamat si Kim sa lahat ng sumuporta sa pelikula, lalo na sa mga tagahanga ng tambalang KimPau. Binati rin niya ang kanyang leading man na si Paulo Avelino.

“Magkita-kita po tayo sa sinehan ngayong PASKO! Maraming salamat po sa tiwala at pagmamahal! Isang napakagandang Christmas gift po nito. Sa lahat ng #KimPau na nagdasal para sa movie maraming salamat. Eto na po ang simula. @mepauloavelino congrats!”

IIkot ang “A Perfect Marriage” sa kuwento nina Mara at Joel, na ginagampanan nina Kim at Paulo. Sa kabila ng tila perpektong pagsasama ng mag-asawa, susubukin ang kanilang relasyon ng matitinding emosyonal na hamon matapos ang ilang taong pagdadalamhati, mga personal na kabiguan at masakit na karanasang dulot ng hirap nilang magkaanak.

Nakatakdang ilabas ang opisyal na teaser ng pelikula sa Miyerkules, Oktubre 14, ganap na alas-6 ng gabi.

Ang “A Perfect Marriage” ang pinakabagong proyekto nina Kim at Paulo, na mas kilala bilang tambalang KimPau. Kabilang sa mga nauna nilang pinagsamahang proyekto ang “My Love Will Make You Disappear,” “Linlang” at “The Alibi.”