Trump, pagbabawalan na ang CNN, MS NOW at Politico sa White House

WASHINGTON — Inanunsyo ni US President Donald Trump nitong Biyernes na pagbabawalan na niya ang tatlong pangunahing news outlet—CNN, MS NOW at Politico—na makapasok sa White House, na kanyang pinakabagong banta laban sa independent press.

Tinatayang mahaharap sa mga legal na hamon ang hakbang na ito, matapos sabihin ng mga eksperto sa freedom of speech na maaaring salungat ito sa First Amendment ng US Constitution, na nagbibigay ng proteksyon sa malayang pamamahayag at malayang pagpapahayag.

Inakusahan ni Trump ang mga nasabing outlet ng pag-uulat ng “fake news” sa isang post sa social media. Sinabi rin niya na hindi dapat patuloy na makapagsulat o makapag-ulat ang mga ito ng tinatawag niyang “fiction and lies” kapag nagbabalita tungkol sa US president. Dagdag ni Trump, isusunod na rin niya ang iba pa umanong “fake news media outlets.”

Gayunman, makikita pa rin noong Biyernes ng hapon ang mga kinatawan ng tatlong outlet na nagtatrabaho sa White House matapos ang post ni Trump. Ayon sa Fox News, na binanggit ang isang hindi pinangalanang senior White House official, ipinaalam ng White House sa tatlong outlet na pagbabawalan silang makapasok sa compound ng White House simula Sabado.

Sinabi ni Trump na walang partikular na insidenteng naging dahilan ng pagbabawal. Sinabi niya ito sa mga reporter sa Oval Office.

 “Talagang mga naipong ulat lang ito sa nakalipas na ilang taon (It's really just cumulative stories over the past few years),” ani Trump.

“Hindi ko kailangang papasukin sila sa aking—sa bahay ng mga tao (I don't have to let them into my, into the people's house),” dagdag pa niya.

Nang tanungin kung ano ang ibig niyang sabihin sa “others to follow,” binanggit ni Trump ang New York Times at Washington Post, na tinawag niyang “fake news.”

Hindi pa agad malinaw kung gaano kalawak ang pagbabawal na inanunsyo ni Trump. Maaari ring nakadepende sa saklaw nito ang legalidad ng naturang hakbang.

Nagbigay na ang mga korte sa mga presidente ng malawak na kapangyarihan pagdating sa limitadong access sa mga event gaya ng mga pagpupulong sa Oval Office at maliliit na press pool. Ngunit ang mas malawak na pagbabawal sa mga pasilidad ng White House press na karaniwang bukas sa media, o sa mga press credential, ay maaaring mas mahirap ipagtanggol sa ilalim ng First Amendment at mga constitutional protection para sa due process.

Nangyari ang hakbang ni Trump ilang linggo bago ang November 3 midterm elections, kung saan ipinagtatanggol ng kapwa Republican ni Trump ang kanilang maliit na mayorya sa Kongreso. Ayon sa Reuters/Ipsos polls, lumalabas na bumababa ang suporta ng publiko sa mga Republican, habang ang approval rating ni Trump ay nasa malapit sa pinakamababang antas nito sa kasaysayan, kasabay ng giyera sa Iran na sinimulan niya at nagdulot ng pagtaas ng presyo ng enerhiya.

MGA DEKADA NG TRADISYON

Binago ng administrasyong Trump ang ilang dekada nang tradisyon sa ugnayan ng White House at media. Binawasan nito ang access ng maraming malalaking news organization sa presidente habang mas pinalawak naman ang presensya ng mga bagong media outlet na itinuturing na mas sympathetic o mas pabor sa administrasyon.

Sa isang pahayag, sinabi ng CNN na sinusuportahan nito ang mga mamamahayag nitong nagbabalita mula sa White House.

“May karapatan kami sa ilalim ng US Constitution na gawin ang pag-uulat na iyon nang walang hadlang o pakikialam mula sa gobyerno (We have a right under the US Constitution to do that reporting without hindrance or interference from the government),” giit ng CNN sa isang pahayag.

 “Kung matutuloy ang pagbabawal na binanta ni Pangulong Trump, magiging ilegal itong pag-atake sa pundamental at protektadong karapatan sa Konstitusyon  (Should the ban which President Trump threatened go ahead, it would be an illegal assault on that fundamental and constitutionally protected right),” dagdag pa ng CNN.

Sinabi naman ng Politico sa X na magpapatuloy itong patas na mag-uulat tungkol sa kasalukuyan at mga susunod na administrasyon ng White House.

“Patuloy kaming mag-uulat nang patas tungkol sa White House na ito at sa mga susunod pa (We will continue to fairly report on this White House and future ones),” saad ng Politico.

“Masigasig naming ipagtatanggol ang aming mga karapatan sa ilalim ng First Amendment laban sa anumang pagtatangkang limitahan ang mga ito (We will vigorously defend our First Amendment rights against any attempt to restrict them),” dagdag pa ng kumpanya.

Tumanggi namang magkomento ang MS NOW.

“Mahirap isipin ang isang mas lantad na paglabag sa First Amendment kaysa sa pagbabawal ni Trump sa mga news outlet na makapasok sa People's House dahil sa pagpuna sa gobyerno (It's difficult to imagine a more blatant violation of the First Amendment than Trump banning news outlets from the People's House for criticizing the government),” sabi ni Seth Stern, chief of advocacy ng Freedom of the Press Foundation, sa isang pahayag.

Samantala, sinabi naman ni Jameel Jaffer, executive director ng Knight First Amendment Institute sa Columbia University, na ipinagbabawal ng First Amendment sa presidente na parusahan ang mga mamamahayag dahil hindi niya nagugustuhan ang kanilang coverage.

“Kung ang ibig sabihin ni Pangulong Trump ay paaalisin niya ang mga news organization na ito mula sa White House press pool, doble ang pagiging labag sa Konstitusyon dahil ang press pool ay isang ‘public forum’ sa ilalim ng First Amendment. Ibig sabihin, hindi maaaring pagbawalan ng presidente ang mga mamamahayag dito batay sa kanilang pananaw (If President Trump means to expel these news organizations from the White House press pool, his action is doubly unconstitutional because the press pool is a 'public forum' under the First Amendment, which means the president can't exclude journalists from it on the basis of their viewpoints),” aniya.

KASAYSAYAN NG TABLOID 

Sumikat si Trump bilang isang developer sa New York na mahusay sa pagkuha ng atensyon ng mga tabloid newspaper para maiulat ang kanyang buhay panlipunan. Kalaunan, lalo niyang naipakilala ang sarili bilang isang reality television personality bago ang seryosong pagpasok niya sa politika.

Mula nang matagumpay niyang kampanya noong 2016, regular nang pinupuna ni Trump ang media at mas pinaigting pa niya ang kanyang mga reklamo sa kanyang ikalawang termino bilang presidente.

Paulit-ulit niyang hinimok ang mga brodkaster na alisin ang mga comedy o news program na hindi niya gusto o mga programang nagbibiro o pumupuna sa kanya o sa kanyang administrasyon. Hinimok din niya ang Federal Communications Commission (FCC) na bawiin ang mga lisensya ng mga broadcast station na hindi niya sinasang-ayunan.

Nagsampa na rin si Trump ng ilang kaso laban sa media, kabilang ang Wall Street Journal, New York Times, BBC at Des Moines Register. Ayon sa ulat, maaaring magkaroon ng chilling effect o epekto na maaaring makapigil sa malayang pamamahayag ang mga naturang kaso.

Ang mga isinampa niyang defamation case laban sa ABC at CBS ay nauwi sa settlement na nagkakahalaga ng $15 milyon at $16 milyon, ayon sa pagkakasunod.

Noong unang termino ni Trump, sinubukan ng White House na bawiin o suspindihin ang press credentials nina Playboy correspondent Brian Karem at CNN reporter Jim Acosta, ngunit iniutos ng mga pederal na hukom na ibalik ang kanilang White House press passes.

Mula nang bumalik siya sa pagkapangulo noong Enero 2025, hayagan nang kinokompronta ni Trump ang mga reporter, partikular ang mga mula sa US television networks.

Noong nakaraang taon, ipinagbawal din niya ang Associated Press sa karaniwang press pool ng mga reporter na sumusubaybay sa kanyang mga galaw matapos hindi gamitin ng news agency ang paboritong pangalan ni Trump para sa Gulf of Mexico. Iniutos ni Trump sa mga empleyado ng executive branch na tawagin itong “Gulf of America.”