Reklamo laban kina Michelle Dee, Rhian Ramos, ibinasura

Ibinasura ng Makati City Prosecutor’s Office ang reklamong inihain ni Bonifacio Baro alyas “Totoy” laban kina Michelle Dee, Rhian Ramos, Samantha Panlilio at iba pa, kaugnay ng umano’y physical injuries, pagmamaltrato, at illegal arrest, dahil sa kakulangan ng ebidensya.

Nag-ugat ang reklamo sa isang insidente noong Enero sa isang condominium sa Makati City, kung saan inakusahan ni Totoy, dating driver at personal assistant ni Ramos, ang mga artista at kanilang mga kasama na pisikal siyang sinaktan at ilegal na ikinulong. Itinanggi naman ng mga personalidad ang mga alegasyon laban sa kanila.

Tinulungan ng Volunteers Against Crime and Corruption o VACC si Totoy sa paghahain ng reklamo. Una niyang inakusahan sina Ramos, Dee at Panlilio ng torture at illegal detention at naghain ng reklamo sa National Bureau of Investigation o NBI noong Enero.

Umiikot umano ang alitan sa isang nawawalang sobre at mga laman nito. Nauna nang nagsampa si Dee ng qualified theft complaint laban kay Totoy dahil umano sa pagkuha nito ng sensitibong mga larawan. Gayunman, ibinasura rin kalaunan ng Makati City Prosecutor’s Office ang qualified theft complaint laban kay Totoy.

Sinabi naman ng legal counsel nina Dee at Ramos na si Atty. Maggie Abraham-Garduque na walang nakitang mga senyales sa isinagawang medical examination sa ospital na tugma sa alegasyon ni Totoy na siya ay binugbog. Hindi rin umano tumutugma sa kuwento ni Totoy ang mga pinsalang kalaunan ay ipinakita niya sa media.

Samantala, napaulat na kinumpirma ng Barangay Urdaneta sa Makati City na personal na naghain si Dee ng blotter report laban sa isang driver noong Enero 18. Sa kanilang report, sinabi ni Dee na nagtamo siya ng mga pasa, gasgas at mga marka ng kuko sa kanyang kanang braso na umano’y dulot ng driver.

Ang pinakahuling pagbasura sa reklamo ay dagdag sa serye ng mga reklamong nag-ugat sa alitan sa pagitan ni Totoy at ng mga personalidad.

Magkaibigan sina Dee at Ramos, at kapwa may matatag nang karera sa industriya ng entertainment. Nakilala rin si Dee sa larangan ng pageantry matapos niyang kumatawan sa Pilipinas sa Miss Universe 2023, kung saan nakapasok siya sa Top 10. Si Panlilio naman ay isa ring pamilyar na pangalan sa mga beauty pageant. Kinatawan niya ang Pilipinas sa Miss Grand International 2021.