Paulo Avelino, kinuwestiyon ang pagbabawal sa Discord bago ito alisin

Tala ng Editor: Ang artikulong ito at ang mga komentong nakapaloob dito ay isinulat bago alisin ng gobyerno ang pagbabawal sa Discord noong Setyembre 24, 2026.

Kinuwestiyon ni Paulo Avelino ang desisyon ng gobyerno na harangan ang Discord sa Pilipinas, at iginiit na mas marami pang gamit ang platform bukod sa paglalaro. Hinimok din niya ang mga awtoridad na tugunan ang mga isyu sa online safety nang hindi naaabala ang mga taong umaasa sa platform para sa kanilang trabaho at iba pang gawain.

Ibinahagi ng 38-anyos na aktor ang kanyang saloobin sa X matapos ma-block ang US-based tech platform nitong linggo.

“First world countries: Discord, add age verification. Philippines: Discord, bye,” ani Avelino sa kanyang post.

Binigyang-diin niya na ginagamit ng libo-libong Pilipino ang Discord hindi lamang para sa gaming.

“People use Discord for work meetings, school, and running small businesses. Block it and they all get hit, while bad actors just move to another app,” dagdag niya.

Ayon kay Avelino, maaaring itulak lamang ng pag-block sa Discord ang mga masasamang loob na lumipat sa ibang platform.

“Child safety matters. So fix the actual problem, not just the easiest target!” aniya.

Nagpahayag din ng pangamba ang iba pang Filipino creators tungkol sa naturang pagbabawal.

Kinuwestiyon din ng cosplayer, gamer, at content creator na si Alodia Gosiengfiao ang desisyon ng gobyerno. Sa isang maikling post sa Facebook, binigyang-diin niya ang pagkakaiba sa pagitan ng pag-block sa Discord at patuloy na pagiging accessible ng mga online gambling app, na aniya ay nagpapakita ng hindi pagkakapare-pareho sa approach ng gobyerno.

Samantala, binigyang-pansin naman ng voice actor at content creator na si Kat Langomez, na mas kilala online bilang KiraKiraKat, ang posibleng epekto ng restriction sa mga taong umaasa sa Discord para sa kanilang trabaho.

Sa isang post sa X, sinabi niyang mahalaga ang platform sa kanyang kabuhayan bilang isang artist at voice actor na nagtatrabaho sa game development.

“The digital sector supports a massive portion of our national workforce across IT, creative arts, and game development. A hasty, blanket restriction risks crippling these essential industries,” aniya.

Ipinaliwanag din ni KiraKiraKat kung bakit mahalaga sa kanya ang remote work bilang isang magulang.

“As a single mother raising a child with special needs, remote work is not just a convenience; it is my family’s lifeline,” ani niya.

Ayon sa kanya, bahagi na ng kanyang araw-araw na workflow ang Discord, kabilang ang production pipelines, asset management, at real-time collaboration kasama ang mga creative team mula sa iba’t ibang panig ng mundo.

Giit ni KiraKiraKat, dapat mas pagtuunan ng pansin ang digital media literacy, mental health support, at parental oversight sa halip na paghigpitan ang mga communication platform.

“Abruptly blocking communication channels does not solve online risks; it merely displaces them while inflicting massive collateral damage on law-abiding digital workers,” aniya.

Ang mga reaksyong ito ay kasunod ng kautusan ng Cybercrime Investigation and Coordinating Center (CICC) noong Setyembre 23 na i-block ang Discord sa bansa. Ayon sa ahensya, ginagamit ang platform ng ilang online communities na iniuugnay sa "violent extremism," "grooming," at iba pang banta sa mga menor de edad.

Sinabi rin ng CICC na nabigo ang Discord na magkaroon ng kasunduan para sa pagtatatag ng lokal na tanggapan sa Pilipinas. Hiniling din sa platform na magtalaga ng resident agent sa bansa upang mapabilis ang pakikipag-ugnayan nito sa mga law enforcement agency.

Naglabas din ng katulad na blocking order laban sa Reddit, na nangakong susunod sa requirement ng gobyerno.

Ang hakbang ng gobyerno ay isinagawa kasunod ng mga pangamba tungkol sa violent extremist content at pagsasamantala sa mga menor de edad online. Lumitaw ang mga alalahaning ito matapos ang pamamaril noong Setyembre 18 sa Banga National High School sa South Cotabato, na ikatlong school shooting incident na naitala sa bansa ngayong taon, matapos ang mga insidente sa Tacloban City noong Hunyo at sa Ateneo de Zamboanga University noong Agosto.

Ayon sa mga awtoridad, ginamit umano ng mga extremist network ang iba’t ibang online platform, kabilang ang Discord, upang hikayatin ang mga estudyante na gumawa ng mga karahasan.