Michelle Vito, tinanggap ang marriage proposal ni Enzo Pineda

Matapos ang mahigit anim na taong relasyon, engaged na ang celebrity couple na sina Michelle Vito at Enzo Pineda. Ibinahagi nina Michelle at Enzo ang kanilang engagement sa pamamagitan ng isang joint Instagram post nitong Martes, Nobyembre 3, kalakip ang mga larawan mula sa proposal na naganap noong Oktubre 28.

“And so, our forever begins. A lifetime of beautiful memories ahead of us. A love written by God, in His perfect time. ♡,” saad nila sa caption ng kanilang post.

Makikita sa mga larawang ibinahagi ang masasayang mukha ng dalawa habang ipinagdiriwang ang espesyal na sandaling ito sa kanilang relasyon. Matapos ang kanilang anunsyo, bumuhos ang pagbati mula sa kanilang mga kapwa artista at fans na nakisaya sa bagong yugto ng kanilang pagmamahalan.

Nagbahagi rin ng ilang detalye tungkol sa proposal ang Nice Print Photo, na siyang kumuha ng mga larawan sa espesyal na okasyon.

“Diamonds, fireworks and a garden of purple blossoms—all of Michelle’s favorite details planned by Enzo himself,” ayon sa kanilang post.

Mahigit anim na taon nang magkasintahan sina Michelle, 29, at Enzo, 36. Una nilang kinumpirma ang kanilang relasyon noong Agosto 2020 matapos magkasama sa teleseryeng "Nang Ngumiti Ang Langit." Noong Marso, ipinagdiwang ng dalawa ang kanilang ikaanim na anibersaryo bilang magkasintahan.

Kilala si Michelle bilang isang Filipino-Spanish actress na gumanap sa mga proyektong tulad ng "Aryana," "Pagpag: Siyam na Buhay," "Lovers & Liars," at "The Iron Heart."

Samantala, nakilala naman si Enzo Pineda sa kanyang mga papel sa "Ang Probinsyano," "Pusong Ligaw," "Bar Boys," at "Bar Boys: After School."