Mario Maurer, nagbigay ng blessing sa cast ng Philippine version ng ‘Pee Mak’

Todo-suporta ang Thai superstar na si Mario Maurer sa nalalapit na Philippine adaptation ng “Pee Mak,” matapos siyang magpadala ng video message para kay Wilbert Ross at sa iba pang miyembro ng cast.

Sa isang post kamakailan, ibinahagi ng Viva Films ang video ni Maurer, na siyang gumanap bilang Mak sa orihinal na Thai film noong 2013. Binati niya ang 29-anyos na aktor at singer sa pagganap bilang Mak at ang buong cast ng Philippine version ng pelikula.

“Mabuhay Philippines! I'm Mario Maurer. Thank you for loving our film, Pee Mak. I want to congratulate Wilbert Ross and the whole cast of the Philippine version of Pee Mak. I know you guys will do great,” saad niya sa video.

Inimbitahan din ng 37-anyos na aktor ang mga Filipino fan na panoorin ang pelikula kapag ipinalabas na ito sa mga sinehan sa Oktubre.

“I'm inviting everyone to catch Pee Mak in the Philippine cinemas on October 14. I'm sure you guys are gonna have a great time there. See you! Mahal ko kayo!” aniya.

Ikinalugod ng mga fan ni Maurer at mga tagasuporta ni Wilbert ang kanyang mensahe, lalo na’t marami ang nakapansin sa pagkakahawig ng dalawang aktor. Ilang beses na ring napansin ng fans ang kanilang pagkakahawig, kaya naging kapansin-pansin ang pagkakapili kay Wilbert para gumanap bilang Mak.

Hindi na rin bago kay Maurer ang Philippine cinema. Dati na siyang nakasama ng Filipina actress na si Erich Gonzales sa 2012 romantic film na “Suddenly It’s Magic.”

Patuloy namang pinasisigla ng Viva Films ang interes ng publiko sa Philippine adaptation sa pamamagitan ng pag-imbita sa mga manonood na maging bahagi ng “Pee Mak Barkada” para sa isang movie experience na puno ng “takutan, tawanan, at kiligan.”

Masaya rin ang ilang fans na makita ang suporta ng mga orihinal na bida ng “Pee Mak.” May isang commenter pa ngang nagsabi, “May basbas ng mga OGs. Yes na yes!!”

Hindi lamang si Maurer ang original star ng “Pee Mak” na nagpahayag ng suporta sa bagong bersyon. Nagbahagi rin kamakailan ng kanyang reaksyon si Davika Hoorne, na gumanap bilang Nak katambal ni Maurer sa orihinal na pelikula.

Sa isang naunang video na ibinahagi ng Viva Films, pinanood ni Davika, 34, kasama ang kanyang asawang si Thai actor Chantavit Dhanasevi, ang official trailer at teaser ng Philippine adaptation. Masaya niyang tinanggap ang bagong bersyon at ipinahayag ang kanyang suporta at pagmamahal para sa nalalapit na Filipino remake.

Ang orihinal na “Pee Mak” ay isang high-grossing Thai supernatural horror-comedy at romance film na hango sa klasikong Thai folklore ni Mae Nak Phra Khanong. Muling binuo ng pelikula ang kilalang kuwento tungkol sa multo bilang isang nakakatawa at nakakaantig na kuwento ng pag-ibig at pagkakaibigan.

Para sa local adaptation, si Wilbert ang gaganap bilang Mak, habang si Bea Binene, 29, naman ang bibida bilang Nak. Kasama rin nila sina Vandolph Quizon, Jairus Aquino, TJ Valderrama, at Gian Bernardino bilang barkada na magdadagdag ng katatawanan sa pelikula.

Sa direksyon ni Victor Villanueva, mapapanood ang “Pee Mak” sa mga sinehan sa buong bansa simula Oktubre 14.