Mara sisters, pinabilib ang Venice sa kanilang sabayang pag-arte

Ibinahagi ng magkapatid na aktres na sina Rooney Mara at Kate Mara na ang kanilang maraming taon ng pagsasama at karanasan ang nakatulong sa kanila upang maisagawa ang isang kakaibang hamon sa pag-arte—ang magsalita nang eksaktong sabay sa pelikulang “Bucking Fastard” ni Werner Herzog, na ipinalabas sa Venice Film Festival nitong Huwebes.

Sa pelikula, na hango sa tunay na kuwento ng magkapatid na British twins, ginagampanan ng Mara sisters sina Jean at Joan Holbrooke. Dahil sa pambihira nilang pagiging malapit sa isa’t isa, sabay silang nagsasalita, pareho silang nananaginip at kapwa nahuhulog sa iisang lalaki.

Ito ang unang pagkakataon na magkasama sa isang pelikula ang magkapatid.

 “May dalawang linggo kaming nakatakdang rehearsal, at magkasama na kami ni Kate bago pa iyon dahil medyo kinakabahan kami,” sabi ni Rooney Mara sa Reuters. (“We had two weeks of rehearsal set up and me and Kate were together before that because we were quite nervous.)

Gayunman, sinabi ni Herzog na labis siyang humanga sa nakita niya kaya pinaikli niya ang rehearsal period mula dalawang linggo hanggang limang araw lamang.

 “Sinabi ko, ‘Tama na. Lubos akong kumpiyansa na magiging maganda ito. Itigil na natin ito, tumahimik na kayo, at magkita tayo sa Ireland sa harap ng camera ko,’” kwento ni Herzog sa Reuters. (“I said, ‘No more. I'm completely confident it's going to be wonderful. Stop this, shut up, we'll meet in Ireland in front of my camera.”)

Ayon kay Herzog, walang kapantay ang ginawa ng magkapatid sa pelikula.

 “Walang katulad ang ginagawa nila. Wala pa tayong nakitang ganito sa kasaysayan ng pelikula, at duda akong may makikita tayong katulad nito sa malapit na hinaharap,” giit niya.  (“It's unprecedented what they are doing. We have not seen anything like this in film history, and I doubt that we will see anything like this in the foreseeable future again.”)

MUSIKAL NA PAGKAKASABAY

Sinabi ni Rooney Mara, na nakilala sa kanyang mga papel sa “The Social Network” at “The Girl With the Dragon Tattoo,” na ang matagal nilang pagsasama ay nagbigay sa kanila ng natural na paraan ng pag-unawa sa isa’t isa na agad gumana nang magsimula ang shooting.

 “May isang mundong hindi na kailangang sabihin sa pagitan namin at hindi na kami nahirapang  likhain. Hindi pa ako nakakatawa nang ganito kalala. Isa itong napaka-espesyal at kakaibang karanasan na minsan lang mangyari sa buong buhay,” sabi ni Rooney Mara. ( “There was just an unspoken world between us that we didn't have to work very hard to create at all. I've never laughed so much, it was a very once-in-a-lifetime, unique experience.”)

Para naman kay Kate Mara, na kabilang sa mga proyekto ang “House of Cards” at “24,” ang pagsasalita nila nang sabay ay halos parang pagkanta.

 “Parang kanta halos ang pakiramdam ng pagsasalita namin nang sabay,” kwento ni Kate Mara. (“It felt almost like a song.”)

Makikita sa pelikula ang dalawang magkapatid na parehong nahuhulog sa iisang lalaki, na ginagampanan ni Orlando Bloom. Nang iwan sila nito para sa ibang babae, napilitan siyang humingi ng restraining order upang maprotektahan ang sarili mula sa galit ng magkapatid.

Sinabi ni Bloom na kakaiba ang kanyang karanasan sa pag-arte kasama ang magkapatid.

“Parang sabay silang humihinga, sabay nananaginip, sabay umiibig at sabay nag-iisip,” saad niya.

(“They were almost like they were breathing together, dreaming together, loving together, thinking together.”)

 “Parang isang tula ang pelikula, at sila ang sentro nito na talagang hinahangaan namin,” dagdag pa nito. (“The movie feels like a poem, and they were the central focus that we were kind of marvelling at.”)

Hindi na bago kay Herzog ang Venice Film Festival. Ilang beses nang lumahok sa festival ang award-winning German director, na kilala sa mga pelikulang “Aguirre, the Wrath of God,” “Fitzcarraldo” at “Grizzly Man.”

Unang ipinalabas niya sa festival ang “Scream of Stone” noong 1991, at ilang ulit na siyang nagbalik sa Venice para maghandog ng mga pelikulang fiction at dokumentaryo.

Ang “Bucking Fastard” ay isa sa 21 pelikulang naglalaban para sa Golden Lion, ang pinakamataas na parangal ng Venice Film Festival. Igagawad ang award sa Setyembre 12.