KZ Tandingan, hindi pa handang maging ina

Kamakailan ay sinabi ni KZ Tandingan na hindi niya minamadali ang pagiging ina dahil para sa kanya, ang pagiging magulang ay isang panghabambuhay na responsibilidad.

Sa kanyang guest appearance sa “Gandang Gabi, Vice!” kasama ang kanyang asawang si TJ Monterde, napag-usapan nila ni Vice Ganda ang pressure na madalas nararanasan ng mga mag-asawa sa Pilipinas pagdating sa pagkakaroon ng mga anak.

Tinanong ni Vice sina KZ, 34, at TJ, 36, kung paano nila hinaharap ang mga tanong ng ibang tao kung bakit wala pa silang anak kahit ilang taon na silang magkasama.

“Ever since naman, si TJ talaga iyong nag-o-open up na ready na siya maging tatay,” ani KZ. “But, it's more on my side na may mga gusto pa akong gawing bagay sa career ko, may gusto pa akong mga i-build sa sarili ko as a person, as a woman.”

Para kay KZ, ang pagiging magulang ay isang malaking responsibilidad na higit pa sa pagkakaroon ng sapat na pera o matagumpay na career.

“I want to make sure that I'm not a baby taking care of a baby,” aniya.

Kinilala ng singer at rapper na walang sinuman ang maaaring maging ganap na handa para sa pagiging magulang, ngunit naniniwala siyang dapat pa ring magsikap ang isang tao na maging handa para sa responsibilidad na kaakibat nito.

“It's not even a matter of... Kasi, like, ‘pag sinasabihan kami na, ‘May pera, sold out ‘yung mga shows tapos ganito.’ But, it doesn't just end with that. Hindi lang siya gano'n eh. It's a lifetime responsibility,” paliwanag ni KZ.

“Ayoko na parang mag-anak lang ako because I was pressured into becoming a mom. Ayoko lang maging nanay kasi kailangan mo may mag-aalaga kapag tumanda,” aniya.

Ibinahagi rin ni KZ na nagkaroon siya ng mahaba at personal na mga pag-uusap sa Diyos tungkol sa pagiging ina.

“Lord, to be honest with you, well, alam mo naman ang laman ng puso ko, Lord. But, to be honest with you, I'm not saying I don't wanna be a mom but I'm not yet ready to be a mom,” paggunita niya.

Sinabi niya na kung bahagi ng plano ng Diyos para sa kanya ang pagiging ina, umaasa siyang natural at kusang gagabayan siya patungo rito.

Samantala, buong suporta naman si TJ sa desisyon ng kanyang asawa. Bagama’t inamin niyang para sa kanya ay handa na siyang maging ama, sinabi niyang nirerespeto niya ang timeline ni KZ at masaya na siya sa buhay nilang magkasama.

“Sapat na sa akin 'yun. Kung magkaka-baby kami, that's a blessing. But kung kaming dalawa lang, I'm very much happy with my life right now with my wife,” ani TJ.

Labing-isang taon nang magkasama sina KZ at TJ at anim na taon na silang kasal. Nagsimula ang kanilang relasyon noong 2015 at ikinasal sa isang intimate garden ceremony sa The Farm at San Benito sa Batangas noong 2020. Noong 2023, nagsagawa sila ng ikalawang seremonya bilang pagdiriwang ng kanilang ikatlong wedding anniversary upang makadalo rin ang mga kapamilya at kaibigang hindi nakasama sa kanilang unang kasal.