Kathryn, Nadine o Liza? Fans, may kanya-kanyang opinyon kung sino ang pinakamagaling na aktres

Nagkakaroon ng mainit na diskusyon sa X kung sino kina Nadine Lustre, Kathryn Bernardo, at Liza Soberano ang karapat-dapat tawaging “Best Actress of Their Generation.”

Nagsimula ang usapan matapos mag-post sa X ng isang hypothetical na tanong kung sino sa tatlong aktres ang nararapat sa naturang titulo.

“LET'S TALK ACTING!! Sino sa tingin n'yo ang mas angat pagdating sa acting? If you had to choose a Big 3 of female actresses, sino ang deserving ng title na ‘Best Actress of their Generation’???” mababasa sa post.

Iba-iba ang naging reaksiyon ng mga netizen, kung saan ipinagtanggol ng mga tagahanga ang kani-kanilang paboritong aktres.

Binigyang-diin ng mga tagasuporta ni Kathryn ang husay niya sa mga madramang papel at ang tagumpay ng kaniyang mga pelikula sa takilya bilang mga dahilan kung bakit karapat-dapat siya sa titulo.

“Magaling naman sila talaga, pero para sa akin, Kathryn pa rin,” komento ng isang netizen.

“Of course, doon ako sa back-to-back Box Office Queen! Kasi kung hindi ka magaling umarte, hindi ka naman papanoorin sa sinehan. Kathryn Bernardo ’yan,” sulat naman ng isa pang tagahanga.

Iba’t ibang papel na ang ginampanan ni Kathryn, 30, sa mga pelikulang tulad ng "The Hows of Us," "Hello, Love, Goodbye," at "A Very Good Girl." Ipinakita ng mga proyektong ito ang iba’t ibang mukha ng kaniyang pag-arte, mula sa madamdaming romantikong drama hanggang sa mas madilim at komplikadong karakter.

Samantala, itinampok naman ng mga tagasuporta ni Nadine ang kaniyang kakayahang gumanap sa iba’t ibang uri ng papel, gayundin ang mga parangal na natanggap niya para sa kaniyang mga pagganap.

“Si Nadine para sa akin, all-rounder din,” saad ng isang netizen.

Binanggit naman ng isa pang tagahanga ang mga natamong parangal ng aktres sa pag-arte.

“Si Nadine Lustre, may MMFF, Gawad Urian, at FAMAS Best Actress award. Doon pa lang, tapos na ang usapan,” komento nito.

Naipamalas ni Nadine, 32, ang kaniyang kakayahan sa mga pelikulang tulad ng "Never Not Love You," "Greed," at "Deleter." Kinilala rin ang kaniyang mga pagganap ng ilan sa mga pangunahing organisasyong nagbibigay ng parangal sa industriya ng pelikula sa bansa.

Hindi rin nagpahuli ang mga tagasuporta ni Liza, na kasalukuyang pinalalawak ang kaniyang karera sa Hollywood. Pinuri nila ang banayad ngunit epektibong ekspresyon ng aktres at ang kakayahan niyang bigyang-buhay ang iba’t ibang karakter.

“Si Liza para sa akin. Hindi OA ang mga subtle expression niya. Nagbabago ito depende sa karakter,” paliwanag ng isang netizen.

Binigyang-diin naman ng isa pang tagasuporta ang husay ni Liza sa voice acting.

“Liza. Mahirap ang voice acting. Ginamit ang performance niya sa audition sa final film,” komento nito.

Kabilang sa mga proyektong kinabilangan ni Liza ang romantic-drama na "Alone/Together," ang animated series na "Trese," kung saan siya ang nagbigay-boses sa pangunahing karakter na si Alexandra Trese, at ang Hollywood film na "Lisa Frankenstein." Ang 28-anyos na aktres din ang nagbibigay-boses sa pangunahing karakter ng animated film na "Forgotten Island."

Bukod sa pagbabahagi ng kanilang mga opinyon, nag-post din ang ilang netizen ng mga larawan ng mga parangal, pagkilala, at eksena mula sa mga pelikula ng tatlong aktres upang suportahan ang kanilang mga pinili.

May ilan namang mas balanseng pananaw ang ibinahagi at sinabing magkakaiba ang estilo ng pag-arte ng tatlo, kaya may kani-kaniya silang lakas sa pagbibigay-buhay sa kanilang mga karakter.

“Iba iba kasi atake nila when it comes to acting. Different style pero lahat sila magagaling,” pahayag ng isang netizen.

Nagsimula ang diskusyon nitong weekend at patuloy na umaani ng reaksiyon mula sa mga gumagamit ng X. Habang nagtatampok ang mga tagahanga ng mga pagganap, parangal, at personal na opinyon upang suportahan ang kanilang mga napili, ipinakikita ng usapan na magkakaiba ang pamantayan ng mga manonood sa pagkilala sa husay ng isang aktres sa pag-arte.