Jose Mari Chan, muling nagparamdam sa pagsisimula ng Christmas season sa Pilipinas

Pagsapit ng Setyembre, muling nagparamdam ang tinaguriang Christmas icon na si Jose Mari Chan. Sinalubong ng OPM icon ang pagsisimula ng “Ber” months sa kanyang espesyal na paglabas sa morning show na “Unang Hirit” noong Martes, Setyembre 1.

Bilang bahagi ng taunang tradisyon, inawit ni Chan ang kanyang paboritong Christmas classic na “Christmas in Our Hearts,” na lalong nagbigay ng masayang diwa habang sinisimulan ng Pilipinas ang pinakahihintay na countdown patungong Pasko.

Kasama ni Chan sa programa si Baus Rufo, isa sa mga host ng “Unang Hirit,” na nagbihis bilang “Mariah Carey” impersonator bilang bahagi ng selebrasyon sa unang araw ng “Ber” months.

Sa loob ng ilang dekada, naging bahagi na ng mahaba at maagang pagdiriwang ng Pasko sa Pilipinas ang “Christmas in Our Hearts.” Mula nang ilabas ito noong 1990, labis nang naiugnay ang kanta sa pagsisimula ng Christmas season kaya maging si Chan ay naging paboritong paksa ng mga meme.

Taun-taon, nag-uumapaw sa social media ang mga nakatutuwang post ng netizens bilang pagsalubong sa “Jose Mari Chan Day,” habang ang nakangiting mukha ng singer ay naging isa na ring simbolo ng Christmas season.

Nakikisabay din ang 81-anyos na singer sa mga birong tungkol sa kanyang taunang pagbabalik tuwing “Ber” months. Minsan na niyang biniro na dahil sa kanyang kanta ay nananatili siyang “forever young.”

Gayunman, higit pa sa mga meme ang koneksyon ni Chan sa “Ber” months. Ang kanyang mga walang-kupas na Christmas song ay tila hudyat na rin ng pagsisimula ng mahabang Christmas season sa bansa. Pagsapit ng Setyembre, maririnig na ang kanyang mga awiting pamasko sa mga shopping mall at pampublikong lugar sa iba’t ibang panig ng Pilipinas.

Dahil sa patuloy na kasikatan ng “Christmas in Our Hearts,” lalo ring nakilala si Chan bilang isa sa mga personalidad na pinaka konektado sa pagdiriwang ng Paskong Pilipino.

Ang kanta ang pinaka mabentang Filipino Christmas record sa kasaysayan at nananatiling isa sa pinaka mabentang OPM songs sa lahat ng panahon.

Ang mainit at nakasentro sa pamilya nitong mensahe ay sumasalamin sa diwa ng Paskong ipinagdiriwang ng mga Pilipino mula Setyembre hanggang Disyembre. Isa rin sa mga paboritong awiting pamasko ni Chan ang “A Perfect Christmas.”

Dahil sa patuloy niyang kasikatan, nananatiling aktibo si Chan sa industriya ng musika. Bagama’t nagsimula siya sa showbiz noong kalagitnaan ng 1960s, sinabi na niya noon na wala pa sa kanyang isip ang pagreretiro. Wala siyang planong tumigil sa pagsusulat ng mga kanta at pagtatanghal hangga’t patuloy na nakikinig ang mga tao sa kanyang musika.

Kamakailan ay ginulat niya ang mga manonood sa kanyang espesyal na paglabas sa Araneta Coliseum para sa ika-10 anibersaryo ng isang tech firm, kung saan inawit niya ang “Christmas in Our Hearts” at “Tell Me Your Name.”

Muling makakasama ni Chan ang The CompanY para sa “Timeless Harmonies” concert sa Music Museum sa Setyembre 12.

Pinaghahandaan din ng veteran singer ang magiging abalang Christmas season. Pangungunahan niya ang concert na “A Christmas with the OPM Icons” sa Disyembre 12 sa Newport Performing Arts Theater.

Bagama’t pinakakilala si Chan sa kanyang Christmas music, hindi lamang sa panahon ng Pasko umiikot ang kanyang naging impluwensya sa OPM. Siya ang sumulat at umawit ng ilan sa mga pinakakilalang OPM songs, kabilang ang “Beautiful Girl,” “Please Be Careful with My Heart,” “Constant Change,” “A Love to Last a Lifetime,” at “Can We Just Stop and Talk Awhile.”

At sa tuwing sasapit ang Setyembre, muling magbabalik si Chan upang salubungin ang pagsisimula ng Christmas season.