Jopay Paguia, nag-react sa umano’y hidwaan nila ni Rochelle Pangilinan

Nagbigay na ng pahayag ang miyembro ng SexBomb Girls na si Jopay Paguia tungkol sa umano’y hidwaan nila ng lider ng grupo na si Rochelle Pangilinan sa isang episode ng entertainment talk show na “Kalurks.”

Panauhin sa naturang programa ang mga miyembro ng Viva Hot Babes na sina Maui Taylor, Katya Santos, at Andrea Del Rosario nang magpadala ng mensahe si Jopay, 43, kay DJ Jhai Ho, na siyang bumasa ng kanyang pahayag.

“No comment na lang ako diyan. Hayaan na lang natin si [Rochelle] na magsalita nang magsalita. Basta kung saan siya magiging masaya, support namin siya,” ani Jopay.

Samantala, pinili rin ng isa pang miyembro ng SexBomb na si Sunshine Garcia na huwag nang pahabain pa ang usapin. “Deadmahin na lang,” ang maikli niyang tugon.

Ang naging pahayag nina Jopay at Sunshine ay kasunod ng mga naging pahayag ni Rochelle tungkol sa dynamics ng grupo nang mag-guest siya sa “Fast Talk with Boy Abunda.” Kasama niya sa naturang guesting si Aira Bermudez at ilan pang miyembro ng SexBomb.

Bagama’t hindi nagbigay si Rochelle, 44, ng partikular na detalye tungkol sa anumang hindi pagkakaunawaan, sinabi niyang natural na magkaroon ng mga hindi pagkakasundo sa pagitan ng mga miyembro ng isang grupo.

“But nakadepende pa rin iyan kung paano magiging maayos,” ani Rochelle. “Case-to-case basis. Kung gusto maging maayos ng isa, magiging maayos talaga eh.”

Ipinaliwanag din niya na habang lumilipas ang mga taon, mas naging mahirap na pagsama-samahin ang buong grupo dahil mayroon na ngayong kanya-kanyang pamilya at trabaho ang mga miyembro.

Kasunod nito, nagpahayag naman ng suporta si Aira para kay Rochelle sa isang Facebook post. Ibinahagi niya ang post tungkol sa kanilang guesting sa “Fast Talk with Boy Abunda,” kung saan tinanong ang mga miyembro tungkol sa istilo ni Rochelle bilang lider.

“May mga taong ginagawang bossy ang pagiging matatag, at tinatawag na control freak ang pagiging deretso magsalita. But what they don’t see is the heart behind it all. Rochelle is the kind of leader who will always put the group’s growth above her own career,” isinulat ni Aira.

Aminado si Aira na maaaring maging istrikto si Rochelle, ngunit sinabi niyang nagmumula ito sa kagustuhan nitong mapanatili ang isang partikular na pamantayan para sa grupo.

“She just wants to share the blessings, wisdom, and success na pinaghirapan niya. People love to embrace the wins without seeing the silent sacrifices she makes to get us there and that’s okay,” dagdag niya.

“I know her heart, I see her hard work, at buong-buo ang respeto ko sa kanya. A true leader who carries us all with pure love.”

Nagsimula ang mga espekulasyon tungkol sa umano’y tensyon sa pagitan ng SexBomb Girls matapos hindi lumabas sina Jopay at Sunshine sa music video ng grupo na “Mama Mama.”

Gayunman, sa kabila ng mga espekulasyong ito, nagpatuloy ang mga proyekto ng SexBomb Girls bilang grupo. Naging matagumpay ang kanilang pagbabalik sa entablado nang magkaroon sila ng “Get, Get Aw!” reunion concert sa Araneta Coliseum noong Disyembre 2025.

Dahil sa mataas na demand para sa kanilang reunion, nagkaroon din sila ng karagdagang mga pagtatanghal. Hindi lang sa Pilipinas natapos ang kanilang comeback, dahil nagtanghal din ang grupo sa ibang bansa, kabilang ang Australia at United States.

Kasunod ng kanilang reunion concerts, nagpahiwatig si Rochelle na bukas ang SexBomb Girls sa paggawa ng panibagong musika at iba pang creative projects.

Bilang bahagi ng kanilang pagbabalik, inilabas ng grupo ang “Mama Mama” at isang coffee table book na nagdodokumento sa kanilang comeback. May ginagawa na rin silang documentary series.

Itinatag noong 1999 ng choreographer na si Joy Cancio, unang sumikat ang SexBomb Girls bilang mga featured dancer sa noontime show na “Eat Bulaga!” Kalaunan ay nakilala rin sila sa musika at pag-arte dahil sa kanilang mga signature songs at energetic performances.

Kabilang sa kanilang mga naging sikat na kanta ang “The Spageti Song,” “Bakit Papa?” at “Halukay Ube.”