Hollywood, nagbigay ng unang silip sa Walk of Fame star ni Lea Salonga

Hollywood, nagbigay ng unang silip sa Walk of Fame star ni Lea Salonga

Nakatakdang gumawa ng panibagong kasaysayan si Lea Salonga sa Hollywood Boulevard, at ngayon ay unang nasilayan ng kanyang mga tagahanga ang Walk of Fame star na igagawad sa Filipino Broadway icon.

Bago ang opisyal na pagkilala sa kanya sa Setyembre 4, nagbigay ang Hollywood Walk of Fame ng teaser ng bagong brass-and-terrazzo star ni Salonga. Kikilalanin siya sa Live Performance category bilang ika-2,855 na personalidad na bibigyan ng prestihiyosong parangal.

Gaganapin ang seremonya sa Biyernes, Setyembre 4, alas-11:30 ng umaga PST o alas-2:30 ng madaling araw ng Sabado sa Philippine time, sa labas ng makasaysayang Hollywood Pantages Theatre.

Maaaring magtungo ang mga tagahangang nais masaksihan nang personal ang makasaysayang sandali sa public viewing area sa Argyle Avenue, sa tapat ng venue.

Hindi rin mahuhuli ang mga tagahanga mula sa iba’t ibang bahagi ng mundo dahil mapapanood nang live ang seremonya sa walkoffame.com, katuwang ang Variety.

Pangungunahan ng Emmy-winning journalist na si Sibley Scoles ang selebrasyon, na dadaluhan din ng ilang kilalang personalidad, kabilang ang “Mulan” co-star ni Salonga na si Ming-Na Wen, R&B singer na si Brandy, at Broadway alum na si Darren Criss.

Simula lamang ang parangal sa sunod-sunod na selebrasyon para kay Salonga sa Los Angeles. Makalipas ang dalawang araw, sa Setyembre 6, tatanggapin naman niya ang Icon Award sa ikatlong taunang Manila International Film Festival gala sa The Beverly Hilton.

Agad namang nagpahayag ng suporta sa social media ang kapwa Filipino artists para sa Broadway icon.

"OMG we're so proud of you coach," ani singer Vina Morales. "We'll have a photo there when I get back to LA."

Ang Walk of Fame star ay isa na namang mahalagang pagkilala sa makasaysayang karera ni Salonga. Noong 1991, siya ang naging unang Asian actress na nanalo ng Tony Award for Best Actress in a Musical para sa kanyang pagganap sa “Miss Saigon,” na lalo pang nagpasikat sa kanya.

Muli siyang gumawa ng kasaysayan sa Broadway makalipas ang dalawang taon nang maging unang Asian performer na gumanap bilang Éponine sa “Les Misérables.” Ilang beses siyang nagbalik sa naturang musical sa kabuuan ng kanyang karera, at pinakahuli siyang gumanap bilang Madame Thénardier sa 2026 “Les Misérables: The World Tour Spectacular.”

Para naman sa maraming henerasyon ng moviegoers, kinikilala rin si Salonga bilang isang official Disney Legend matapos niyang maging singing voice nina Princess Jasmine at Mulan.

Mula sa pagganap bilang The Witch sa isang local production ng “Into the Woods” hanggang sa pagbibigay-boses sa isang pangunahing kontrabida sa paparating na Filipino-themed feature ng DreamWorks Animation na “Forgotten Island,” patuloy na binabasag ni Salonga ang mga hadlang at pinag-uugnay ang iba’t ibang kultura sa pamamagitan ng kanyang talento.