Heart Evangelista, naging production assistant ni John Prats sa isang araw

Mula sa pagiging mukha ng kamera, pansamantalang lumipat sa likod ang style icon na si Heart Evangelista para maging bahagi ng production team ni Direk John Prats.

Naka-staff uniform at ID din si Heart habang nanonood sa rehearsal ng “Biyaheng Bente” concert ni Yeng Constantino, kung saan personal niyang nasaksihan ang mga puspusang paghahanda sa likod ng entablado.

Nagbahagi si John, 42, ng mga larawan mula sa rehearsal sa Instagram: “Hearty tried to explore my world for a day. From being in front of the camera to seeing what happens behind it, welcome to the director’s side, Missy,” ani John.

Mukhang nasiyahan naman si Heart at nagkomento ng “Favorite.”

Nagbahagi rin ang management agency ni John na Cornerstone Entertainment ng ilang larawan kung saan makikitang masaya ang dalawa habang nagtatrabaho. Kasama rin nila sa larawan ang singer na si Yeng Constantino.

Kuha ang mga ito habang naghahanda para sa ikatlong araw ng “Biyaheng Bente” concert ni Yeng, na gaganapin sa Nobyembre 17 sa Smart Araneta Coliseum. Si John ang nagsisilbing direktor ng concert, matapos niya ring pamunuan ang una at ikalawang araw nito.

Sa hiwalay na post, binigyan naman ng Cornerstone Entertainment ng pasilip ang mga fans sa naging araw ni Heart sa likod ng kamera sa pamamagitan ng isang video kung saan makikitang magkasama sila ni John habang nagtatrabaho backstage.

“Nabitin ba kayo sa kilig? Huwag kayong mag-alala, ito na talaga ‘yun…” pahayag ng ahensya sa kanilang caption.

Ipinakita sa video ang masayang pagsasama nina Heart at John, habang tumutugtog sa background ang kantang “Teka Lang” ni TJ Monterde. Kamakailan ay nagkasama rin ang dalawa sa music video ng nasabing kanta.

Nagtapos ang video sa isang “coming soon” teaser, na nagpapahiwatig na maaaring may kasunod pa ang kanilang muling pagtatrabaho nang magkasama.

Ang muling pagsasama nina Heart at John ay kasunod ng kanilang mga naging reunion, kabilang ang paglabas sa reality series ni Heart na “Heart World” at iba pang mga espesyal na okasyon.