Gelli de Belen, masaya para sa relasyon ng kanyang pamangkin na si Kaila Estrada at Daniel Padilla

Ipinahayag ni Gelli de Belen ang suporta niya sa relasyon ng kanyang pamangkin na si Kaila Estrada at kasintahan nitong si Daniel Padilla, at sinabing natutuwa siya dahil napapasaya ng aktor si Kaila.

Sa pinakabagong episode ng Jeepney TV’s “Stars on Stars, nakipagkuwentuhan si Gelli sa kanyang kapatid at ina ni Kaila na si Janice de Belen, kung saan napag-usapan nila ang relasyon ng dalawa.

Naitanong ni Janice ang naging papel ni Gelli bilang Betty sa “La Luna Sangre,” kung saan ginampanan niya ang tiyahin ng karakter ni Daniel.

“Anong feeling na halos nagkatotoo ‘yung role mo as Betty sa La Luna Sangre bilang tita ni Daniel?” tanong ni Janice.

“Eh, tita naman niya talaga ako,” sagot ni Gelli.

Napag-usapan din ang isa pang koneksyon nina Gelli at Daniel nang tanungin siya ni Janice kung ninang siya ng aktor.

Ibinahagi ni Gelli na inaanak pala niya si Daniel o DJ, at noong nakaraang taon lamang niya ito nalaman.

“Inaanak ko pala siya. Hindi

ko alam. Nalaman ko lang last year nung sinabi sa akin ni Karla. ‘Ano ka ba? Inaanak mo ‘yan, eh.’ Inaanak ko pala si DJ. Hindi ko alam. I'm sorry. So, ang dami kong utang,” ani Gelli.

Pabirong sinabi ni Gelli na may higit na ibig sabihin pa sa tanong ni Janice bago niya ibahagi ang saloobin bilang tiyahin ng aktor.

“Bilang tiyahin ni DJ. Actually, wala naman akong magagawa diyan, eh,” biro niya.

Gayunman, sinabi ni Gelli na maganda naman ang naging pakikitungo sa kanya ni Daniel sa paglipas ng panahon.

“Syempre, natutuwa naman ako kasi mabait naman sa akin si DJ. DJ's always been good to me. He's always treated me well. He's always been respectful of me. So, okay ako,” saad niya.

Dahil ngayon ay nagde-date sina Daniel, 31, at Kaila, 30, sinabi ni Gelli na masaya siya para sa dalawa.

“So, syempre... with him being with Kaila now, I am happy for both of them. I am happy that he makes Kaila happy. And I'm hoping it stays that way,” ani Gelli.

Gayunman, aminado si Gelli na nananatili siyang maingat dahil sa mga nangyari sa nakaraan ni Daniel.

“Pero syempre, parang I'm also careful because of all the past stuff,” dagdag niya.

Nang tanungin siya ni Janice kung may dahilan pa rin para maging maingat, sinabi ni Gelli,

“Eh, pero habang masaya sila, habang naliligayahan sila at maayos sila and they bring out the best in each other, ‘yun ang importante.”

Patuloy na pinag-uusapan ng publiko ang relasyon nina Kaila at Daniel mula nang lumabas ang mga tsismis tungkol sa kanilang dalawa noong huling bahagi ng nakaraang taon.

Samantala, sinabi ni Janice na hindi naman siya lubusang nagulat nang magkaroon ng relasyon sina Kaila at Daniel.

“Iyong naramdaman ko, wala naman kasi parang na-predict ko naman na may mga ganitong mangyayari,” ani Janice.