Claudine Barretto, nagbantang kasuhan si Cristy Fermin

Naglabas ang abogado ng aktres na si Claudine Barretto ng pinal na cease-and-desist demand laban kina showbiz commentator Cristy Fermin at co-host nitong si Rommel Villamor, na kilala rin bilang Romel Chika, kaugnay ng mga pahayag ng dalawa tungkol sa aktres sa kanilang YouTube show.

Noong Linggo, Oktubre 18, ibinahagi ni Barretto sa Instagram ang kopya ng demand letter, kalakip ang maikli ngunit makahulugang caption na “Lawyer up.”

Sa liham, inilarawan ng abogado ni Barretto ang mga pahayag ng dalawa sa isang kamakailang inilabas na video bilang ‘untruthful, scandalous, and damaging’ sa reputasyon ng aktres.

Hiniling ng abogado kina Fermin at Villamor na itigil ang paggawa ng mga pahayag na nakapipinsala kay Barretto at ang mga gawaing itinuring niyang pangha-harass sa aktres.

“Failure to comply with our valid and lawful demands may subject you to liabilities which may or may not be presently available under the circumstances,” nakasaad sa liham.

Nilinaw rin sa liham na hindi nangangahulugan ang naturang demand na isinusuko ni Barretto ang iba pang posibleng batayan ng paglabag sa umiiral na mga batas at regulasyon. Hindi rin nito naaapektuhan ang anumang karapatan ng aktres na magsampa ng kaukulang kaso laban sa mga komentarista, batay man sa kontrata o sa batas.

“Please consider this demand final beyond the ambit of any reconsideration,” dagdag pa sa liham.

Hinimok din ng abogado sina Fermin at Villamor na agarang bigyang-pansin ang naturang usapin upang maiwasan ang magastos at mabigat na proseso ng paglilitis.

Nag-ugat ang demand sa isang kamakailang episode ng “Showbiz Now Na!” kung saan tinalakay ng dalawang host ang Instagram post ni Barretto na nagpapakita sa kaniya habang nakahiga sa kama sa ospital. Sa naturang episode, nagbigay ng mga espekulasyon ang dalawa tungkol sa pagkakaospital ng aktres, kabilang ang pagtatanong kung sumailalim siya sa pagtanggal ng sobrang balat matapos pumayat.

Tinalakay rin sa programa ang masasakit na komento ng ilang online basher, kabilang ang isang pahayag na nag-uugnay sa dating nobyo ni Barretto na si Rico Yan, na pumanaw na.

“Meron isang nagsabi, ‘Naku, baka sinusundo ka na ni Rico,’” pahayag ni Fermin.

Pinag-usapan din ng dalawa ang mental health ng aktres, kabilang ang umano'y diagnosis sa kaniya na bipolar disorder, gayundin ang kaniyang gamutan at pag-inom ng gamot.

Iginiit din nina Fermin at Villamor na si Gretchen Barretto, kapatid ni Claudine, ang nagbayad ng mga gastusin nito sa ospital. Kinuwestiyon din nila kung kakayanin pa ni Claudine na sagutin ang mga gastusin. Ayon pa sa dalawa, wala umanong kasalukuyang trabaho ang aktres at umaasa ito sa tulong pinansiyal ng kaniyang kapatid.

Binanggit din ng mga komentarista ang mga naunang reklamo ni Claudine na hindi umano nagbibigay ng sapat na suportang pinansiyal ang dating asawa niyang si Raymart Santiago para sa kanilang mga anak.

Pinayuhan nina Fermin at Villamor ang aktres na huwag nang ibahagi sa social media ang mga detalye tungkol sa kaniyang pagkakaospital at personal na relasyon. Ayon sa kanila, maaari itong maging dahilan upang makatanggap siya ng batikos at maging paksa ng mga usap-usapan.

Kalaunan, sinagot ni Barretto, 47, ang mga pahayag sa pamamagitan ng isang Facebook post. Nilinaw niyang na-diagnose siya ng post-traumatic stress disorder (PTSD), battered woman syndrome, at anxiety attacks, at hindi ng bipolar disorder.

“I was diagnosed with PTSD, battered [woman\ syndrome & anxiety attacks. Hindi po ako BIOPOLAR,” sulat niya.

Itinanggi rin ng aktres na umaasa siya sa tulong pinansiyal ni Gretchen at pinabulaanan ang pahayag na kapatid niya ang nagbayad ng mga gastusin niya sa ospital.

“At may pera po ako ni piso walang binayaran ang Ate Gretchen ko. Never akong umasa sa Ate ko. Sya mismo nagsabi na never sya nagbigay ng tulong o pera sa akin. Get your Facts right!!” aniya.

Sa pinakahuli niyang update sa social media, ipinahiwatig din ng aktres ang plano niyang lumapit sa National Bureau of Investigation (NBI) upang magsampa ng reklamong cyberlibel.

“Hello NBI. See you in a few days. Maka recover lang thighs ko sa operation,” sulat niya.