Bela Padilla, Martin Tan, hiwalay na ilang araw matapos maging publiko ang relasyon

Kinumpirma ni Bela Padilla ang hiwalayan nila ng tech CEO na si Martin Tan ilang araw lamang matapos nilang kumpirmahin ang kanilang relasyon.

Ibinahagi ng aktres ang balita noong Linggo, Setyembre 27, at tinawag itong isang “quick life update.” Sinabi niyang nagdesisyon siyang pareho silang magpatuloy sa kani-kanilang buhay nang magkahiwalay.

Bagama’t hindi ipinaliwanag ni Bela kung ano ang naging dahilan ng kanilang hiwalayan, sinabi niyang naniniwala siyang ang paghihiwalay ang tamang desisyon para sa kanilang dalawa.

“I'm deciding for both of us to move forward separately to save whatever we can of ourselves and how we see each other. I think sometimes, loving someone also means knowing when to let go, before you lose the good things you saw in each other.”

Sa kabila ng kanilang paghihiwalay, positibo pa rin ang naging pahayag ni Bela tungkol kay Martin at ipinahayag niya ang kanyang pasasalamat sa panahong pinagsamahan nila.

“Martin is one of the most fun, smartest, and definitely most charming people I’ve ever met. I will always be grateful for what we shared, and I genuinely wish him nothing but the best” aniya.

Ibinahagi rin ni Bela kung ano ang naging kaibahan ng relasyon niya kay Martin.

“Martin and I have been dating for the past few months, and this was the first relationship where I was truly swept off my feet. We share the same love for films, food markets, our work, and, most of all, genuinely being together,” patuloy niya.

Sinabi ni Bela na una niyang piniling maging pribado ang kanilang relasyon dahil napakapersonal nito para sa kanya. Inilarawan niya ito bilang isang relasyon kung saan naramdaman niyang siya ang “most like and unlike” sa kanyang sarili.

Kalaunan ay mas napansin ng publiko ang kanilang relasyon matapos kumalat online ang mga video ng dalawa sa Legazpi Market. Ayon kay Bela, bahagi lamang ng kanilang pinagsamahan ang mga sandaling iyon.

“We all saw a new couple, a bit shy and awkward. But what you never got a glimpse of is us having the best and also hardest days for a couple of months now,” ani Bela.

Nagpasalamat din siya sa mga taong sumubaybay sa kanilang relasyon mula sa malayo dahil sa kanilang suporta at paggalang sa kanilang privacy tuwing nakikita silang magkasama.

“PS: I know I never really posted or shared anything, but if I could immortalize one night here on my account, it would be this lovely, ordinary one,” pagtatapos niya.

Kalakip ng mensahe ni Bela ang isang larawan at video na nagpapakita ng ilang moments mula sa kanilang relasyon. Sa isa sa mga ito, makikitang magkahawak-kamay ang dalawa habang naglalakad, habang sa isa naman ay makikitang magkasama sila habang tinitingnan ang isang artwork.

Naging publiko ang relasyon nina Bela at Martin noong kalagitnaan ng Setyembre matapos silang makitang magkasama ni Johnny K, na kalaunan ay itinampok sila sa kanyang content.

Sa panayam, ibinahagi ni Martin na walong buwan na silang magkasama. Sinabi rin ng dalawa na nagkakilala sila sa pamamagitan ng isang kaibigan at ibinahagi ang ilan sa mga bagay na pinahahalagahan nila sa isa’t isa.