Bagong animated movie na ‘Pokémon: Wild Card,’ ipapalabas sa 2027

Magbabalik sa big screen ang Pokémon franchise sa pamamagitan ng “Pokémon: Wild Card,” isang bagong animated movie na nakatakdang ipalabas sa iba’t ibang bahagi ng mundo sa 2027. Ito ang magiging unang bagong Pokémon movie mula noong 2020 at ang unang feature-length animated film ng franchise makalipas ang ilang taon.

Unang ipinakilala ang pelikula sa closing ceremony ng 2026 Pokémon World Championships sa San Francisco noong Linggo, Agosto 30.

Sa isang maikling teaser, ipinakilala ang mga pangunahing karakter ng pelikula, kabilang ang isang manlalaro ng Pokémon Trading Card Game at si Mimikyu, ang misteryosong Ghost at Fairy-type Pokémon. Nakasaad sa teaser na ang pelikula ay “coming 2027 and beyond,” na posibleng nagpapahiwatig na ang “Wild Card” ang magiging simula ng isang bagong serye ng mga pelikula.

Nagbahagi rin ang official Pokémon Instagram account ng clip mula sa paparating na pelikula at inilarawan ito bilang isang “all-new animated film” na tampok ang isang Pokémon TCG player at si Mimikyu.

Ayon sa Deadline, unang lumabas si Mimikyu sa 2016 video games na “Pokémon Sun” at “Pokémon Moon.” Nagtatago ang Pokémon sa ilalim ng isang lumang tela na ginuhitan upang magmukhang Pikachu dahil malungkot ito at nais nitong mahalin din tulad ng sikat na mouse Pokémon. Sa ilalim ng kanyang anyo ay isang maitim at tila aninong katawan na may dalawang bilog na mata.

Mula nang ipakilala si Mimikyu, lumabas na ito sa ilang Pokémon games, sa Pokémon Trading Card Game, at sa Pokémon anime.

Isang team na may malawak na karanasan sa paggawa ng anime ang nasa likod ng paparating na pelikula. Si Katsuhiko Kitada, isang key animator sa “I Want to Eat Your Pancreas,” ang magdidirek ng “Pokémon: Wild Card,” habang si Akemi Hayashi naman ang nangangasiwa sa character designs.

Ang Story Inc., ang production company sa likod ng mga pelikulang tulad ng “Weathering with You,” “Suzume,” at “The Colors Within,” ang magpo-produce ng pelikula. Ang CloverWorks naman ang nangangasiwa sa animation at kilala sa mga sikat at pinuri ng mga kritiko na anime gaya ng “Horimiya,” “The Promised Neverland,” at “Spy x Family.”

Ang “Pokémon: Wild Card” ang magiging unang Pokémon movie mula sa “Pokémon the Movie: Secrets of the Jungle,” na ipinalabas sa Japan noong 2020.

Ayon sa Asia One, isa pang Pokémon project na darating sa 2027 ang “Pokémon Tales: The Misadventures of Sirfetch’d & Pichu.” Ang stop-motion series ay kamakailang binigyan ng go signal ng Disney+ bilang bahagi ng isang global distribution agreement sa The Pokémon Company International.

Mapapanood ang serye sa Disney XD at eksklusibo rin itong mapapanood sa Disney+ sa susunod na taon.