Atasha Muhlach, ibinahagi na matagal na niyang pangarap na pasukin ang showbiz

Matagal nang pangarap ni “Bongga Ka ‘Day!” lead star Atasha Muhlach na pasukin ang showbiz. Sa kanyang guest appearance sa “Fast Talk with Boy Abunda,” ibinahagi niyang bata pa lamang siya ay pangarap na niyang maging bahagi ng industriya ng entertainment.

Bagama’t kumuha siya ng business degree, ipinaliwanag ni Atasha, 24, na pinili niya ang kursong ito dahil nais niyang mabigyan ng direksiyon at estruktura ang kanyang pagiging malikhain.

"Ang pangarap ko actually, it was just to enter showbiz. Ever since. So, the reason why I took business is because it allows me to put structure into my creativity because growing up I've always been a very creative person," pagbabahagi ni Atasha.

Mahilig na si Atasha sa sining mula pa noong bata siya. Kabilang sa mga kinahiligan niya ang pag-arte sa mga school play, pagguhit at pagtugtog ng mga instrumentong pangmusika.

“So, ever since, being surrounded with a showbiz family, it was kind of my natural environment in a way,” dagdag pa niya.

Bukas din si Atasha sa iba't ibang oportunidad sa industriya ng entertainment, maging sa pagkanta, pagsayaw o pag-arte.

“I want to do everything. I don't want to close my doors to anything,” aniya.

Pinatunayan naman ni Atasha ang kanyang mga sinabi sa pamamagitan ng pagtuklas sa iba't ibang larangan ng showbiz mula nang simulan niya ang kanyang karera. Kabilang dito ang paglabas sa telebisyon, pagho-host, pag-eendorso ng mga produkto, pagiging brand ambassador at pag-arte sa teatro.

Suportado rin ng kanyang mga magulang na sina Aga Muhlach at dating beauty queen at aktres na si Charlene Gonzales ang kanyang pangarap. Ayon kay Atasha, hindi siya kailanman pinigilan ng kanyang mga magulang na tahakin ang landas ng showbiz, lalo na't bata pa lamang siya ay naipahayag na niya ang kagustuhang maging bahagi ng industriya.

“They kind of understood na ‘she's going to enter [showbiz].’ Because I asked when I was a kid,” kuwento niya. Gayunman, nais muna ng kanyang mga magulang na makatapos siya ng pag-aaral bago tuluyang pasukin ang showbiz, isang kondisyong malugod naman niyang tinanggap.

“That is a promise that I'm very very grateful for because I promised to them that I would finish my education before entering showbiz,” dagdag pa niya.

Tinupad ni Atasha ang pangakong ito nang makapagtapos siya ng business degree na may honors sa Nottingham Trent University sa England, United Kingdom, noong 2023. Napili rin siyang magbigay ng mensahe ng pasasalamat sa ngalan ng kanyang mga kasabay na nagsipagtapos.

Sa edad na 24, nakatuon ngayon si Atasha sa teatro at gumaganap bilang pangunahing bida sa musical na “Bongga Ka ‘Day!” kasama ang mga bagong talento at batikang aktor sa teatro. Nagsimula ang pagtatanghal nito noong Setyembre 18 at magpapatuloy hanggang Oktubre 24.