Angelica Jones, Sachzna Laparan nagsalita na sa kontrobersiya sa “Miss Flawless” cover

Binasag na nina actress-turned-politician Angelica Jones at content creator-actress na si Sachzna Laparan ang kanilang katahimikin hinggil sa kontrobersiyang bumabalot sa 2019 remake ng kantang “Miss Flawless,” na inawit nina Flow G at Honcho tampok si Sachzna.

Sa panayam sa Fast Talk with Boy Abunda, nilinaw ni Angelica ang naging papel niya sa kanta at iginiit na bagama’t si Lito Camo ang kompositor nito sa ilalim ng Star Records, siya ang orihinal na mang-aawit ng naturang awitin.

“Ang kantang Miss Flawless, original na kumanta ng Miss Flawless, ako po talaga.”

Ipinaliwanag ni Angelica na nananatili kay Camo at sa Star Records ang karapatan sa kanta, ngunit naalala niyang sinabi umano ng kompositor na dapat muna siyang hingan ng pahintulot ng sinumang nagnanais gumamit nito.

Ikinuwento rin niya na nilapitan siya ng production team noong 2019 upang lumabas sa isang cameo sa music video. Dahil nais niyang suportahan ang proyekto at i-promote ang Laguna, ang kanyang home province, kung saan mayroon siyang tungkuling may kaugnayan sa turismo noong panahong iyon, pumayag siyang makilahok.

Nang pumasok siya sa serbisyo publiko, hiniling umano niyang maging simple ang kanyang magiging appearance sa video.

“Hindi ako pwede magsuot ng mga sexy outfit, kasi honorable na ako. Siguro pwede kikay-kikay.”

Gayunman, matapos niyang maglaan ng oras para sa shooting, sinabi umanong kanselado ang filming. Kalaunan, nalaman niya sa pamamagitan ng Laguna Tourism na nagpatuloy pala ang production nang wala siya.

“Sabi ko, ‘Ano nangyari? ’Di ba may shooting ngayon? ’Di ba kasama ako? What happened?’”

Direktang pinabulaanan ni Angelica ang mga alegasyong hindi siya available o hindi niya nais pagbigyan ang production crew. Sinagot din niya ang umano’y pagiging mailap ni Sachzna tuwing nagkakasalubong sila sa mga public event, at sinabing hindi man lamang umano siya kinikilala ng content creator.

“Ang akin lang naman kasi, ilang beses na kami nagkita sa event, wala man sabihing, ‘Hi, hello, sorry po, or thank you.’”

Nilinaw ni Angelica na ayaw na niyang patagalin alitan at nais lamang niya ng pananagutan.

“Hinihintay ko lang naman is, sorry and thank you, that's it.”

Samantala, sa isang Facebook video, ipinaliwanag ni Sachzna ang kanyang panig at sinabing matapos ang anim na taon ng pananahimik, naramdaman niyang panahon na upang magsalita.

“For the longest time, mas pinili ko pong manahimik. Pero this time, feeling ko, kailangan ko na pong magsalita at masabi ’yung side ko.”

Ayon kay Sachzna, ang kanyang management at production team ang nag-asikaso sa naturang proyekto. Aniya, mayroon silang mga text at call log mula noong 2019, ngunit hindi maaaring isapubliko ang mga ito dahil sa mga legal na konsiderasyon.

Sinabi rin niya na dalawang beses silang nakipagkita ng kanyang ina kay Lito Camo, kung saan nakuha umano nila ang kanyang pag-apruba at nagbigay rin ng token of appreciation bago ang filming.

Kinumpirma niyang bahagi si Angelica sa orihinal na konsepto, ngunit sinabi niyang hindi natuloy ang cameo dahil sa hindi pagtutugma ng kanilang mga iskedyul.

“Hindi po nagtugma-tugma ’yung mga schedules namin dahil sobrang busy niya po sa kanyang anak, sa politics.”

Tungkol naman sa alegasyong hindi niya pinapansin si Angelica sa mga event, inamin ni Sachzna na naging mailap siya sa dating aktres matapos ang ilang taon ng pagtanggap ng batikos mula sa publiko.

“Naging awkward na rin kasi for me... genuinely, hindi ko na rin po alam kung papaano pa siya i-approach.”

Sa kabila ng magkaibang bersyon ng dalawang panig, iginiit ni Sachzna na nananatili ang kanyang paggalang kay Angelica at humingi ng paumanhin para sa naging hindi pagkakaunawaan. Handa rin siyang tuluyang iwan ang bansag na “Miss Flawless” kung makatutulong ito para sa kaniyang peace of mind..

“Mas importante po sa akin ang respeto, katahimikan, at peace of mind.”