‘Where It All Started’ concert ni Moira dela Torre, inilipat sa susunod na taon

Ipagpapaliban sa susunod na taon ang concert ni Moira dela Torre na “Where It All Started,” na nakatakda sanang ganapin sa Oktubre 4 sa SM Mall of Asia Arena.

Kinumpirma ito ng Ovation Productions sa isang pahayag na inilabas sa social media noong Setyembre 29. “We regret to announce that the MOIRA: "Where It All Started" concert scheduled for October 4, 2026 at SM Mall of Asia Arena has been postponed to next year,” saad sa pahayag.

Hindi nagbigay ng dahilan ang organizers para sa pagbabago ng schedule, ngunit humingi sila ng paumanhin sa fans para sa anumang abalang maaaring idulot nito.

Ang mga ticket holder na nais magpa-refund ay pinayuhang direktang makipag-ugnayan sa Ticketmaster sa pamamagitan ng website nito o customer support. Nagkakahalaga ang mga ticket mula ₱1,750 hanggang ₱8,850.

Sa ngayon, wala pang inilalabas na detalye tungkol sa bagong petsa ng concert at iba pang updates.

Samantala, umani rin ng iba’t ibang reaksiyon online ang biglaang pagpapaliban ng show. May ilang fans na nagpahayag ng pagkadismaya dahil nakapaghanda na sila para sa concert, kabilang na ang pag-book ng flights at hotel accommodations.

May iba naman na piniling tingnan ang positibong bahagi nito, at sinabing mas magkakaroon sila ng oras para makapaghanda para sa concert.

Sa pagtatapos ng kanilang pahayag, nagpasalamat ang Ovation sa fans para sa kanilang pasensya at pang-unawa at nagpahayag ng pag-asang makasama nila ang mga ito sa concert sa susunod na taon.

Unang inanunsyo ni Moira ang “Where It All Started” noong Hulyo. Nakatakda sana itong maging unang headline concert ng singer sa SM Mall of Asia Arena sa Pasay City ngayong taon.