‘Doll House’ stars Baron Geisler at Althea Ruedas, muling magsasama sa ‘Henyo’

Apat na taon matapos mag-iwan ng marka sa puso ng mga manonood sa pelikulang “Doll House,” muling magsasama sa isang proyekto sina Baron Geisler at child star Althea Ruedas sa pelikulang “Henyo.”

Ibinahagi ng Viva Films ang balita sa pamamagitan ng isang social media post.

“Happy 1st Day of Shoot! Abangan ang HENYO, starring Baron Geisler, Althea Ruedas, and the GRAND DAME OF PHILIPPINE COMEDY, Ms. Nova Villa! Coming soon, exclusively in cinemas!” anunsyo ng Viva Films.

Si Mel Mendoza-Del Rosario, na sumulat ng screenplay ng “Henyo,” ay siya ring nasa likod ng mga pelikulang “Family Matters” at “Family of Two.” Si Joy Aquino naman, na dating nagdirek ng “Us Again,” ang magsisilbing direktor ng bagong pelikula.

Bagama't hindi pa inaanunsyo ang opisyal na petsa ng pagpapalabas ng pelikula, nagbigay na ang Viva Films ng paunang silip sa proyekto sa pamamagitan ng isang 49-segundong teaser.

“Hanggang saan ang kaya mong ipanalo para sa mga mahal mo? Winner ang family ngayong holiday season!” saad ng production house sa kanilang social media post.

Unang nagsama sa pelikulang “Doll House” sina Geisler, 44, at Ruedas, 13, bilang mag-ama noong 2022. Tumimo sa puso ng maraming manonood ang madamdaming kuwento ng pelikula, na naging isa rin sa mga pinakapinanuod na pelikula sa Netflix.

Mula noon, patuloy na pinalawak nina Geisler at Ruedas ang kani-kanilang karera sa pag-arte sa pamamagitan ng iba't ibang proyekto sa pelikula at telebisyon.

Kabilang sa mga pelikula at seryeng kinabilangan ni Ruedas ang “Instant Daddy,” “The Iron Heart,” at “Wonderful Nightmare.”

Samantala, patuloy namang ipinapakita ni Geisler ang kanyang husay sa pagganap sa iba't ibang karakter, mula sa mga komplikado at makukulay na papel hanggang sa mga pangunahing papel sa mga sikat na drama at action projects. Kabilang sa kanyang mga kamakailang proyekto ang “Blood vs Duty,” “Incognito,” at “The Delivery Rider.”

Isa naman si Nova Villa sa mga beteranang komedyante sa bansa. Napanood na siya sa maraming pelikula at serye sa telebisyon, kabilang ang “Chicks to Chicks,” “Miss Granny,” “This Is My First,” “Home Along da Riles,” at “Pepito Manaloto.”

Sa kuwentong nakasentro sa pamilya at taglay na mahusay na cast, inaasahang maghahatid ang “Henyo” ng isang nakaaaliw at makabagbag-damdaming kuwento na tiyak na magugustuhan ng mga manonood.