Senadora Loren Legarda at anak, nahaharap sa ‘political persecution,’ ayon sa abogado

Pulitika—hindi ebidensiya—ang nagtutulak sa mga legal na hakbang laban kay Senadora Loren Legarda at sa kaniyang anak na si Leandro Legarda Leviste, kinatawan ng Unang Distrito ng Batangas, ayon sa kanilang abogado at tagapagsalita na si Tony La Viña.

Matapos ang masusing pagsusuri sa mga alegasyon, iginiit ni La Viña na walang ginawang labag sa batas o hindi nararapat ang alinman sa dalawang mambabatas. Inilarawan niya ang mga negosyo ni Leviste sa enerhiyang solar bilang lehitimong mga gawaing pangnegosyo sa pribadong sektor at lehitimong pakikipagsapalaran bilang negosyante.

"After intensive review, I am convinced that she and her son have absolutely not done anything illegal or even improper with respect to the solar energy business of the latter," ani La Viña. "At worst, Leandro has been innovative and out-of-the-box as an entrepreneur. That should be rewarded, not punished."

Binigyang-diin ni La Viña na nasa yugto pa lamang ng paunang pagsisiyasat ang usapin at wala pang pormal na kasong naisampa. Gayunman, pinuna niya ang Tanggapan ng Ombudsman dahil sa mga pahayag nito sa publiko na, ayon sa kaniya, ay nagbibigay ng "unmistakable impression that liability has already been assumed."

Bilang tugon sa mga pagtatangkang iugnay ang senadora sa mga negosyo ng kaniyang anak, nilinaw ni La Viña na walang pagmamay-ari, tungkulin sa pamamahala, o pinansiyal na interes si Legarda sa Solar Para sa Bayan Corporation (SPBC) o sa alinmang kompanya ng Solar Philippines.

"Saying she's connected to the business only because she's the mother of a private businessman is pure invention," ani La Viña. "Responsibility is personal. Senator Legarda should not be shielded from scrutiny because Leviste is her son. But neither should motherhood become evidence against her."

Tungkol sa prangkisa ng SPBC, sinabi ni La Viña na hindi ito eksklusibo, wala itong kalakip na subsidiya mula sa pamahalaan, at hindi bumoto si Legarda sa pagpasa nito. Idinagdag niyang hindi kailanman ipinagbili ang prangkisa at hindi ito lubusang naipatupad dahil hindi nakapaglabas ang Kagawaran ng Enerhiya ng mga kinakailangang tuntunin at regulasyon para sa pagpapatupad nito. Pinaalalahanan din niya ang mga kritiko na huwag paghalu-haluin ang magkakahiwalay na korporasyon at ang magkakaibang permit ng pamahalaan.

Sa pagtatanggol sa naging takbo ng pagnenegosyo ni Leviste, iginiit ni La Viña na hindi maituturing na kriminal na gawain ang mga kakulangan sa patakaran o mga ideyang pangnegosyo na hindi naisakatuparan. Nanindigan siyang pinalaki ng mga negosyo ni Leviste ang kapasidad ng bansa sa paglikha ng enerhiyang solar nang hindi nadehado ang pamahalaan o ang publiko.

Ayon kay La Viña, ang biglaang pagtindi ng pagsisiyasat sa mag-ina ay isang pampolitikang pagganti. Sinabi niyang umigting ang mga imbestigasyon kaagad matapos ilantad ni Leviste sa publiko ang katiwalian sa pamahalaan noong huling bahagi ng 2025 at manawagan ng malawakang pagsisiyasat.

"The timing speaks for itself," ani La Viña, na inilarawan ang mga hakbang bilang "classic lawfare—the weaponization of the law for political purposes."

Tinawag ni La Viña ang sitwasyon na isang malinaw na kaso ng pampolitikang pag-uusig, katulad ng mga taktikang ginamit laban sa mga personalidad ng oposisyon sa mga nakaraang administrasyon, at nanawagan siyang agarang itigil ang mga prosesong legal na ito.