Senador Gatchalian, isinusulong ang localized class suspensions

Nanawagan si Senate President Sherwin Gatchalian ng localized na suspensyon ng klase upang mabawasan ang pagkaantala ng edukasyon, habang tinitiyak ang kaligtasan ng mga mag-aaral at guro sa panahon ng mga sakuna at masamang panahon.

Ayon kay Gatchalian, ang malawakang suspensyon sa malalaking lugar ay maaaring nakakaantala ng klase sa mga eskwelahang ligtas at hindi naman apektado ng isang partikular na kalamidad.

“Nakababahala ito. Bagama’t alam nating layunin ng suspensyon ng klase na tiyakin ang kaligtasan ng mga mag-aaral at guro, ang malawakang pagkaantala sa mga klase ay maaaring magpalala sa pagkawala ng mga natutuhan ng mga mag-aaral (This is concerning. While we know that class suspensions seek to ensure the safety of learners and teachers, widespread disruption to classes can aggravate learning loss),” sabi ni Gatchalian.

Binanggit niya ang datos na nagpapakitang naapektuhan ng mga suspensyon ng klase ang face-to-face na pagtuturo sa iba’t ibang bahagi ng bansa nang hindi bababa sa 20 araw ng pasok sa nakalipas na 30 araw.

Natuklasan din ng Second Congressional Commission on Education (EDCOM II) na nawawalan ang mga paaralan ng nasa 30 hanggang 50 araw ng klase mula sa 180-araw na school calendar dahil sa mga suspensyon sa nakalipas na dalawang taon.

Sinabi ni Gatchalian na kailangang balansehin ng mga awtoridad ang pangangailangang protektahan ang mga mag-aaral at ang pagpapatuloy ng edukasyon sa mga lugar na hindi apektado ng mga sakuna.

“Bagama’t tinitiyak natin ang kapakanan ng ating mga mag-aaral tuwing may kalamidad, kailangan din nating tiyaking magpapatuloy ang edukasyon sa mga ligtas na lugar (Although we ensure the welfare of our students whenever there is a calamity, we must also ensure that education continues in safe areas),” ayon pa sa senador.

Kasama ang kanyang panukala sa Senate Bill No. 53, o ang 21st Century School Boards Act. Layunin nitong bigyan ng responsibilidad ang mga local school board na magpatupad ng napapanahon, organisado, at lokal na mga hakbang para sa basic education tuwing may mga sakuna, kalamidad, at iba pang emergency.