Sen. Hontiveros: Mga pamamaril sa paaralan, nagpapaigting sa pangangailangan para sa Sagip Bata Act

MAYNILA — Iginiit ni Senadora Risa Hontiveros nitong Lunes na ang pinakabagong pamamaril sa isang paaralan sa South Cotabato ay nagpapaigting sa pangangailangan na maipasa ang panukalang batas sa Senado na magbibigay sa mga law enforcer ng mas matibay na kapangyarihan para imbestigahan ang online grooming at pagre-recruit sa karahasan.

Binanggit ni Hontiveros ang pinakahuling pamamaril sa Banga National High School sa South Cotabato bilang dahilan upang isulong ang panukala, na magpapalawak sa kakayahan ng gobyerno na tugunan ang nihilistic violent extremism (NVE), partikular ang mga aktibidad na nagaganap online.

“Huwag po natin payagan na masabotahe ang pagpasa ng batas na ito. Hindi na natin kayang maghintay pa. Habang hindi ito napapasa, napipilayan ang ating mga law enforcer sa pagpigil sa pagkalat ng NVE sa bansa (Let us not allow the passage of this law to be sabotaged. We cannot afford to delay any longer. While it remains unpassed, our law enforcers are handicapped in preventing the spread of NVE in the country),” giit ni Hontiveros.

Sa ilalim ng panukalang batas, bibigyan ng awtoridad ang mga imbestigador na humahawak ng mga kaso ng NVE na pormal na humiling ng subscriber at traffic data, gayundin ay magsagawa ng online intelligence-gathering at undercover operations.

Palalakasin din nito ang koordinasyon sa mga foreign law-enforcement agency, na mahalaga sa mga imbestigasyong may kinalaman sa online platforms at mga user na nasa labas ng Pilipinas.

Inaatasan din ng panukala ang mga online platform na magsagawa ng age assurance at age verification, at sumunod sa karagdagang mga requirement.

Kailangan ding magtalaga ang mga online platform ng legal representative na nakabase sa Pilipinas na maaaring tumanggap ng subpoenas, takedown at blocking orders, mga kahilingan para sa account information, at iba pang legal na direktiba ng mga awtoridad.

“Huwag nating hayaang malayang gumala online ang mga groomer nang walang takot. Ipakita natin na mahuhuli sila at mananagot sa pinsalang idinudulot nila sa ating mga anak. Kailangang pagbayaran ng mga groomer na ito ang kanilang ginawa (Let us not allow groomers to roam freely online without fear. Let us show them that they will be caught and held accountable for the harm they cause our children. These groomers have to pay the price),” giit ni Hontiveros.

Layunin ng Sagip Bata Act na palakasin ang Anti-Online Sexual Abuse and Exploitation of Children Act sa pamamagitan ng pagtugon sa mga umuusbong na online threat, kabilang ang NVE.

Ayon kay Hontiveros, kabilang ang panukala sa mga priority measure ng Legislative-Executive Development Advisory Council (LEDAC) at inaasahan niyang mabilis na uusad ang pagpasa nito kapag nalusutan na nito ang Senado.

“May responsibilidad tayo na protektahan ang ating kabataan, at wala tayong dapat ipagpaliban pa (We have a responsibility to protect our youth, and we should no longer delay),” sabi ni Hontiveros.