Secretary Remulla, muling maghahain ng Interpol ‘red notice’ laban kay Zaldy Co

MANILA – Sinabi ni Interior Secretary Jonvic Remulla nitong Martes na tutungo siya sa France upang muling ihain sa International Criminal Police Organization (Interpol) ang kahilingan para sa “red notice” laban sa pinatalsik na Ako Bicol Party-list congressman na si Zaldy Co.

Nasa Lyon, France ang punong tanggapan ng Interpol.

Ang Interpol red notice ay kahilingan sa mga law enforcement agency sa buong mundo na “hanapin at pansamantalang arestuhin ang isang tao habang hinihintay ang extradition, pagsuko, o katulad na legal na aksyon.” Unang naghain ng naturang kahilingan ang gobyerno ng Pilipinas noong Abril.

Sa isang press briefing sa Camp Crame, sinabi ni Remulla na tutungo siya sa France kasama si Ombudsman Jesus Crispin Remulla.

Huling naiulat na nasa Prague, Czech Republic si Co.

“Maghahain tayong muli ng red notice para kay Zaldy Co. Nagkataon din na pupunta ako sa Lyon, France upang i-follow up ang kanyang red notice sa Interpol. Kaya inanunsyo rin ni Ombudsman Boying na pupunta siya sa Paris para makipag-usap sa mga awtoridad doon,” ani Remulla. 

("We are filing a red notice for Zaldy Co again. Coincidentally, I am also going to Lyon, France to follow up on his red notice with Interpol. So Ombudsman Boying announced that he is going to Paris also to talk to the authorities there.")

“Ako ang makikipagtulungan sa Interpol, habang siya naman ang tututok sa diplomatic efforts para makuha si Zaldy Co. Tungkol naman sa iba pa, hihintayin ko ang karagdagang ulat; hindi ko pa masasabi sa ngayon,” dagdag niya.

("I will work with the Interpol, he will work with the diplomatic efforts to get Zaldy Co. As far as the other ones, I will wait for the further report; I can't say yet.)

Sinabi ni Remulla na nagpapatuloy ang paghahanap kay Co at sa kanyang mga kapwa akusado sa kontrobersyal na flood control scandal, ngunit hindi niya sinabi kung nakatanggap na ang Philippine National Police o ang kanyang tanggapan ng anumang pahiwatig na nais sumuko ng mga suspek.

Muling naglabas ang Sandiganbayan ng warrant of arrest laban kay Co, kasama si Leyte 1st District Rep. Martin Romualdez, kaugnay ng kasong plunder dahil sa umano’y mahigit PHP7 bilyong kickback mula sa iba’t ibang proyekto ng gobyerno.

Naaresto si Romualdez sa Cardinal Santos Medical Center sa San Juan City noong Lunes ng gabi matapos siyang ma-confine dahil umano sa isang “cardiovascular event.”

Noong Abril, natunton si Co habang naglalakbay sa iba’t ibang bahagi ng Europe. Mula Portugal ay nagtungo siya sa France bago makarating sa Prague, kung saan siya nahuli dahil wala siyang kaukulang dokumento matapos kanselahin ang kanyang Philippine passport.

Gayunman, kalaunan ay pinalaya si Co ng mga awtoridad ng Czech Republic. Nauna nang natunton ng mga awtoridad si Co sa Portugal.