President Macron, makikipagkita kay Prime Minister Carney para talakayin ang mga usapin sa enerhiya

UNITED NATIONS — Bumisita si French President Emmanuel Macron sa French territory na Saint Pierre and Miquelon noong Linggo, kung saan nakatakda siyang makipagkita kay Canadian Prime Minister Mark Carney, ilang linggo matapos mag-post si US President Donald Trump ng larawan sa social media na nagpapakitang natatakpan ng bandila ng Estados Unidos ang kapuluan.

Unang pagbisita ito ng isang French president sa teritoryo mula nang magtungo roon si dating French President Francois Hollande noong 2014. Nangyari ang pagbisita kasabay ng paghahangad ng Canada na palalimin ang ugnayan nito sa European Union sa gitna ng tensyon sa kalakalan sa Estados Unidos at lumalalang relasyon sa Washington sa ilalim ni Trump.

Matatagpuan sa karagatang malapit sa Atlantic coast ng Canada ang Saint Pierre and Miquelon at ito ang tanging natitirang teritoryo ng France sa North America. Ayon sa mga opisyal ng France, layunin ng pagbisita na bigyang-diin ang soberanya ng France sa kapuluan at ang malapit nitong relasyon sa Canada.

“Para sa isang teritoryong may 5,800 residente, bihira na napakaraming isyung mahalaga sa buong France ang concentrated sa isang lugar na ganito kaliit: ang estratehikong presensya ng France sa North Atlantic, malapit sa Estados Unidos at Arctic, maritime sovereignty, climate change adaptation at pakikipagtulungan sa Canada (For a territory of 5,800 inhabitants, it is rare to find so many issues that are important for France as a whole concentrated in a place of this size: France's geostrategic presence in the North Atlantic, at the doorstep of the United States and the Arctic, maritime sovereignty, adaptation to climate change; and cooperation with Canada),” ayon sa isang opisyal ng French presidency.

Ayon sa mga diplomat, may simbolikong kahalagahan din ang pagbisita ni Macron habang patungo siya sa taunang United Nations General Assembly, matapos mag-post si Trump ng mapa na nagpapakitang nakabalot sa bandila ng Estados Unidos ang US, Canada, Greenland, Iceland, Mexico, Central America at Caribbean at may label na “United States of America.”

Kasama sa naturang larawan ang Saint Pierre and Miquelon at ilang French Caribbean territories.

Hindi tumugon sa publiko ang France sa naturang post noong panahong iyon.

Inaasahang tatalakayin nina Macron at Carney ang energy crisis at ang lumalalim na ugnayan ng Canada sa European Union matapos buksan ng bloc ang posibilidad na maging unang associate member nito ang Canada.

Gayunman, maaaring humarap sa mga hamon ang anumang hakbang tungo sa mas malalim na integration. Mahigit isang dekada matapos pagkaisahan ng EU at Canada ang Comprehensive Economic and Trade Agreement o CETA, at siyam na taon matapos magsimula ang provisional application nito, hindi pa ito niratipika ng ilang miyembrong bansa ng EU, kabilang ang France.