PM Carney, isinusulong ang ideya na maging “associate member” ng EU ang Canada base sa isang ulat

BRUSSELS — Nais ni Canadian Prime Minister Mark Carney na palalimin ang ugnayan ng Canada sa European Union (EU) at pinag-aaralan niya kung maaaring maging “associate member” ng EU bloc ang kanyang bansa, ayon sa ulat ng The Wall Street Journal nitong Linggo.

Ayon sa pahayagan, bukas ang EU sa posibilidad na bigyan ang Canada ng isang bagong status bilang associate member, kahit wala pang umiiral na ganitong uri ng membership. Ito ay batay sa pahayag ng mga opisyal mula sa EU at Canada na hindi pinangalanan.

Hindi tumugon ang Canadian Embassy sa Brussels at mga tagapagsalita ng European Commission sa magkahiwalay na kahilingan para sa komento.

Ang lumalalang trade war sa pagitan ng Canada at Estados Unidos ang nagtulak sa hakbang ng Canada na palakasin ang ugnayan nito sa iba pang trading partners.

Lalong lumala ang relasyon ng Canada at Washington mula nang bumalik si US President Donald Trump sa White House noong unang bahagi ng 2025, dahil sa mga hindi pagkakaunawaan sa kalakalan at iba pang usapin. Nagresulta ang alitan sa pagpataw ng mga taripa sa kalakal na nagkakahalaga ng bilyon-bilyong dolyar sa cross-border trade.

Ayon sa The Wall Street Journal, pinag-uusapan ng Canada at EU kung paano mapapadali ang malayang paggalaw ng mga produkto, serbisyo at manggagawang kabilang sa mga estratehikong supply chain, gaya ng enerhiya, artificial intelligence (AI), depensa at mahahalagang mineral. Sa ganitong paraan, epektibong maililipat ang hangganan ng EU.

Pinag-uusapan din ng Canada at EU ang pagtatayo ng mga underwater cable, magkasanib na pagtatayo ng mga data center, cloud storage at mga bagong satellite network, pati na rin ang imprastraktura para maipadala ang enerhiya ng Canada sa EU, ayon sa pahayagan.

Sabi ng WSJ, regular na nakikipag-usap si Carney sa ilang lider ng EU, partikular kay French President Emmanuel Macron, tungkol sa posibilidad na payagang manirahan at magtrabaho nang walang visa ang mga Canadian sa EU. Sinabi ito ng dalawang opisyal na pamilyar sa usapin na hindi pinangalanan.

Nakatakdang magkita ang dalawang lider sa huling bahagi ng buwang ito.

Hindi tumugon ang tanggapan ni Macron sa kahilingan para sa komento.

Gayunman, hindi magiging madali ang proyekto na mas paglapitin ang Canada at EU, dahil sa mga lumalabas na matinding pagtutol sa isang mas limitadong kasunduan sa kalakalan.

Mahigit isang dekada matapos mabuo ang kasunduan at siyam na taon mula nang pansamantala itong ipatupad, ilang bansa sa EU ang hindi pa rin ito niraratipikahan.