Palasyo, iginagalang ang kasong pandarambong laban kay Rep. Martin Romualdez

MANILA — Sinabi ng Malacañang nitong Lunes na iginagalang nito ang paghahain ng Office of the Ombudsman ng kasong pandarambong laban kay dating House Speaker Martin Romualdez, pinsan ni Pangulong Ferdinand R. Marcos Jr., kaugnay ng umano’y mga iregularidad sa mga proyekto sa flood control.

Ayon kay Palace Press Officer Claire Castro, naaayon ang paghahain ng kaso sa naunang posisyon ng Pangulo na dapat managot ang sinumang mapatutunayang may pananagutan, maging ito man ay miyembro ng pamilya o kaalyadong pulitikal.

“Ang sa Pangulo naman po ay kung sino po ang dapat na managot ay dapat panagutin. Kung sinuman po iyan—kamag-anak, kaibigan, kaalyado o kalaban sa politika,” ani Castro sa isang briefing sa Palasyo.

“Kung ano po ang isinisigaw ng ebidensiya, dapat lamang po itong mailahad.”

Sinabi ni Castro na magkakaroon ng pagkakataon ang mga nahaharap sa kaso na magharap ng ebidensya para sa kanilang depensa.

“At iginagalang po natin ang aksiyon ng Ombudsman dahil ito naman po ay nasa kanilang mandato,” aniya.

Naghain ang Ombudsman nitong Lunes ng kasong pandarambong sa Sandiganbayan laban kay Romualdez at dating Ako Bicol Representative Zaldy Co kaugnay ng umano’y mga iregularidad sa mga proyekto sa flood control.

Inakusahan ng mga imbestigador ang dalawa ng umano’y pagsasagawa ng “concerted and coordinated acts” upang labag sa batas na magkamal, makaipon at makakuha ng ill-gotten wealth na tinatayang ₱56 bilyon mula 2022 hanggang 2025.

Nauna nang nangako si Marcos na pananagutin ang mga sangkot sa iskandalo, kabilang si Romualdez.

Sa kanyang ikalimang State of the Nation Address (SONA) noong Hulyo 27, sinabi ni Marcos na ilang kaso laban sa dating Speaker ang malapit nang ihain sa Ombudsman.

Inilarawan niya ang hakbang bilang “masakit ngunit kinakailangan.”

“Masakit man sa akin ito pero kailangan nating gawin ang tama,” pahayag ng Pangulo, habang binibigyang-diin na ang kanyang pananagutan ay para sa sambayanang Pilipino at hindi para sa kanyang pamilya o mga kaalyado.