Mga senador: Dapat parangalan ang mga bayani sa pamamagitan ng tapat na paglilingkod

MANILA – Sinabi nina Senate President Sherwin Gatchalian at Senator Francis Pangilinan nitong Lunes na dapat parangalan ang mga sakripisyo ng mga bayaning Pilipino sa pamamagitan ng tapat na paglilingkod sa bayan at pagpapakita ng katapangan sa harap ng mga hamon sa kasalukuyang panahon.

Ipinagdiriwang ng bansa ang National Heroes' Day ngayong Agosto 31, isang regular holiday alinsunod sa Proclamation No. 1006 na inilabas ni Pangulong Ferdinand R. Marcos Jr.

Ayon kay Gatchalian, ang pag-alala sa mga Pilipinong nakipaglaban para sa kalayaan, soberanya at demokrasya ng bansa ay dapat ding magsilbing inspirasyon upang patuloy na bumuo ng isang mas maunlad at mas mabuting bansa.

“Magiging mas makabuluhan ang sakripisyo ng ating mga bayani kung bawat isa sa atin ay maglilingkod sa pamilya, komunidad, at bayan nang may integridad, katapatan, at malasakit,” ani Gatchalian sa isang pahayag.

“Sa gitna ng mga problemang kinakaharap ng bansa — tulad ng pagbaha, korapsyon sa gobyerno, mga hamon sa kalidad ng edukasyon, at mataas na presyo ng pagkain at kuryente — sama-sama nating pangalagaan ang kaban ng bayan at tiyaking bawat programa ng pamahalaan ay maayos, tapat, at tunay na nagsisilbi sa bawat pamilyang Pilipino,” aniya.

Samantala, sinabi ni Pangilinan na hindi dapat ikulong ang konsepto ng kabayanihan sa mga kilalang personalidad na mababasa sa mga aklat ng kasaysayan. Aniya, maraming ordinaryong Pilipino ang gumagawa ng sakripisyo para sa kanilang pamilya, komunidad at bansa.

Kabilang na aniya rito ang Overseas Filipino workers (OFWs) at iba pang mga magulang, mga tagapagtanggol ng kalikasan, magsasaka at mangingisda, gayundin ang mga nagsasabi ng katotohanan at mga testigong naninindigan para sa pananagutan sa kabila ng mga banta o tangka ng panunuhol.

“‘Yan ang bayaning Pilipino: Hindi nagpapasiil sa hamon ng buhay,” ani Pangilinan.

Kinilala rin niya ang mga kapitbahay, rider, social worker, health professional at mga boluntaryong tumutulong sa panahon ng sakuna na humarap sa baha nitong mga nakaraang linggo ng tuluy-tuloy na pag-ulan upang makapaghatid ng pagkain, gamot at iba pang tulong sa mga nangangailangan.

Sa mensahe ni Pangulong Marcos para sa National Heroes' Day nitong Lunes, sinabi rin niya na hindi lamang mga kilalang personalidad ang dapat parangalan kundi maging ang mga taong patuloy na naglilingkod sa bansa sa kanilang pang-araw-araw na pamumuhay.