Manny Pacquiao, balik-gobyerno bilang Kalihim ng Anti-Poverty Commission

MANILA — Nagbalik sa serbisyo sa pamahalaan ang dating senador at boxing icon na si Manny Pacquiao bilang lead convenor at secretary ng National Anti-Poverty Commission (NAPC), apat na taon matapos niyang lisanin ang Senado.

Pormal na nanumpa si Pacquiao kay Pangulong Ferdinand R. Marcos Jr. sa Malacañang nitong Martes, na dinaluhan din ni Cabinet Secretary Benhur Abalos. Pinalitan niya si Lope Santos III.

Dahil sa appointment, naging bahagi ng Gabinete si Pacquiao sa ilalim ng Republic Act No. 8425, o Social Reform and Poverty Alleviation Act. Nakasaad sa batas na ang NAPC lead convenor ang namumuno sa commission secretariat at may ranggong katumbas ng isang Cabinet secretary.

Itinatag ang NAPC bilang coordinating at advisory body ng pamahalaan para sa pagpapatupad ng Social Reform Agenda.

Kabilang sa mandato nito ang pag-uugnay ng mga programa laban sa kahirapan ng national at local government units at private sector, pagsubaybay sa pagpapatupad ng mga ito, pagrerekomenda ng mga hakbang sa polisiya, at pagtiyak sa partisipasyon ng mga basic sector sa paggawa ng mga patakaran.

Nangangasiwa rin ang komisyon at nagrerekomenda ng mga hakbang hinggil sa pagbabalangkas, pagpapatupad at pagsusuri ng mga social reform at poverty-alleviation program, gayundin sa paglalaan ng resources.

Ito ang unang government post ni Pacquiao matapos ang kanyang anim na taong termino sa Senado na nagtapos noong Hunyo 2022.

Sa halip na tumakbo muli sa halalan sa Senado noong 2022, kumandidato si Pacquiao bilang pangulo at nagtapos na pangatlo, kasunod nina Marcos at noo'y bise presidente Leni Robredo.

Kalaunan, sinubukan niyang bumalik sa Senado sa 2025 midterm elections bilang bahagi ng Alyansa para sa Bagong Pilipinas slate na sinuportahan ng administrasyon, ngunit hindi siya nakakuha ng puwesto sa 12 available na Senate seats.

Bukod sa politika, nananatiling isa si Pacquiao sa mga pinakakilalang atleta ng Pilipinas. Siya ang tanging boksingero sa kasaysayan na nagwagi ng world titles sa walong weight divisions. Napabilang din siya sa International Boxing Hall of Fame bilang bahagi ng 2025 class.

Malugod namang tinanggap ni Presidential Adviser on Poverty Alleviation Secretary Larry Gadon ang pagkakatalaga kay Pacquiao.

“Napapanahon ang kanyang pagkakatalaga ngayong isinusulong ng administrasyon ang higit pang pagbawas sa bilang ng mga Pilipinong nabubuhay sa kahirapan. Sa tamang direksyon, makatutulong ang NAPC nang higit upang makamit ang mga pagsisikap na mabawasan ang kahirapan,” ani Gadon sa isang pahayag.

(“His appointment is very timely now that the administration is pushing for further reduction of poverty incidence and the NAPC with the right direction could help more to achieve the poverty reduction efforts.”)