Malacañang, itinanggi ang mga alegasyon ni VP Duterte laban kay Pangulong Marcos

MAYNILA — Mariing itinanggi at tinawag na walang basehan ng Malacañang nitong Lunes ang alegasyon ni Vice President Sara Duterte na nakatanggap umano siya ng impormasyon noon pang 2024 tungkol sa plano ni Pangulong Ferdinand R. Marcos Jr. laban sa kanya.

Sa isang social media post, sinabi ni Duterte na kabilang umano sa mga plano ang pagkuha ng arrest warrant mula sa International Criminal Court o ICC laban sa kanyang ama na si dating Pangulong Rodrigo Duterte, gayundin ang pagsasagawa ng pag-atake laban sa kanya.

Ayon pa kay Duterte, ipinaalam niya ang kanyang mga pangamba noon kay dating Armed Forces of the Philippines (AFP) Chief Gen. Romeo Brawner Jr. at humingi ng proteksiyon para sa kanyang mga anak at ina.

Sa isang briefing sa Malacañang, kinuwestiyon ni Presidential Communications Office (PCO) Undersecretary at Palace Press Officer Claire Castro kung bakit hindi inilabas ni Duterte sa publiko ang mga alegasyon noong 2024, gayundin ang mga katulad na banta na sinabi niyang natanggap umano niya noong 2023.

“Ngayon lang po ito nagsulputan (These have only surfaced now),” sabi ni Castro.

Pinabulaanan ni Castro ang mga alegasyon ni Duterte at sinabing wala namang naiharap na ebidensiya o opisyal na rekord upang patunayan ang mga ito.

Inilabas ng Palasyo ang nasabing pahayag ilang araw matapos maglabas ng warrant of arrest ang isang korte sa Quezon City laban kay Duterte kaugnay ng tatlong bilang ng grave threats.

Nag-ugat ang kaso sa kanyang mga pahayag noong Nobyembre 2024 na may kinausap umano siyang isang assassin para patayin sina Pangulong Marcos, First Lady Louise Araneta-Marcos, at noo’y House Speaker Martin Romualdez sakaling siya ay mapatay.

Itinanggi ni Duterte na maituturing na banta ang kanyang mga pahayag. Gayunman, sinabi ng Quezon City Regional Trial Court Branch 98 na may probable cause upang isailalim siya sa paglilitis at itinakda ang piyansa sa ₱120,000 para sa bawat bilang ng kaso.

Si Duterte, na nahaharap din sa impeachment trial sa Senado, ay nagbayad ng kabuuang ₱360,000 na piyansa noong Setyembre 5.

Kasunod nito, nagpahayag siya ng pangamba para sa kanyang kaligtasan at sinabing may dokumentado siyang mga banta at harassment laban sa kanya mula pa noong 2023. Sinabi rin niyang nangangamba siya para sa kanyang mga anak.

Ayon kay Castro, kapwa nagpahiwatig sina PNP Chief Gen. Jose Melencio Nartatez Jr. at National Bureau of Investigation Director Melvin Matibag na walang rekord ang kanilang mga ahensiya tungkol sa mga banta laban kay Duterte.

“Pinapasinungalingan po natin ang pagbibintang na ito ng Bise Presidente, wala po itong anumang ebidensiya at walang anumang records na maipapakita ito (We deny this accusation by the Vice President; there is no evidence or records that can be presented to support it),” giit ni Castro.

Itinanggi rin ni Castro ang pahayag na hindi pinoprotektahan ng administrasyong Marcos ang mga bata.

Binanggit niya ang mga programa ng pamahalaan para sa proteksiyon ng mga bata, seguridad ng mga estudyante, at suporta sa mental health bilang patunay ng patuloy na hakbang ng gobyerno para sa kapakanan at kaligtasan ng mga kabataan.