Imbestigasyon sa 50 Flood Control Projects, natapos na ng COA; Sen. Joel Villanueva, walang koneksyon sa mga Ghost Projects sa Bulacan

Aabot sa 50 flood-control projects ang naimbestigahan o natapos na ang pag-audit ng Commission on Audit (COA).

Sa budget hearing ng COA para sa 2027, humingi ng update si Senate Committee on Finance Chairman JV Ejercito tungkol sa ongoing investigation ng ahensya sa mga maanomalyang flood control at iba pang infrastructure projects.

Ayon kay COA Chairperson Gamaliel Cordoba, nakumpleto na nila ang 50 fraud audit reports ng mga kwestyunableng proyekto.

Sinabi ni Cordoba na naisumite na rin nila ito sa Office of the Ombudsman para magamit sa isinasagawang preliminary investigation at pagsasampa ng kaso.

"Nakatapos na po kami ng 50 fraud audit reports at nasubmit na namin sa Office of the Ombudsman para sa kanilang preliminary investigation at saka sa mga cases that they file" ani Cordoba.

Dagdag pa ni Cordoba, sentro ng kanilang fraud audit report sa ngayon ang mga flood-control projects sa lalawigan ng Bulacan.

Samantala, diretsahang tinanong naman ni Senator Joel Villanueva ang COA kung nakita ba nila sa kanilang pagsusuri na konektado sa kanya ang mga maanomalyang flood-control projects.

"This is no-holds-barred. Can you disclose the results [of the fraud audits]? You can say it even in front of Sen. JV—I wouldn't be embarrassed to hear if Joel Villanueva was involved in the flood control projects flagged by the COA", matapang na pahayag ni Villanueva.

Agad na nilinaw ni Cordoba na wala silang nakitang flood-control projects na kunektado kay Villanueva at base sa kanilang auditing, DPWH Bulacan ang nagpatupad ng proyekto.

"Wala po kaming nakikita.

It’s really the DPWH people yung nag-implement because it’s the budget of the DPWH and it’s their personnel sa Bulacan", paglilinaw ni Cordoba.

"Senator Joel is not [in the findings], and he is not an implementer. He’s a legislator", dagdag pa niya.