Estratehikong paglalagay ng PNP air assets sa buong bansa, iminungkahi

Hinimok ni Senador Erwin Tulfo ang Department of the Interior and Local Government (DILG) na palawakin at estratehikong ipuwesto sa labas ng Metro Manila ang mga aerial asset ng Philippine National Police (PNP) upang mapabilis ang pagtugon sa mga emergency, operasyon sa sakuna at pagpapatupad ng batas sa mga liblib na lugar.

Inihain ni Tulfo ang mungkahi sa budget briefing ng DILG para sa 2027, dahil aniya kailangan ng mas mabilis na pagpunta sa mga lugar na inaabot ng ilang araw bago marating sa pamamagitan ng sasakyan, partikular sa paglaban sa illegal logging at kaingin sa Palawan at Sierra Madre.

“Sa ngayon, kailangang maglakbay nang dalawang araw ang mga forest ranger para lamang ma-inspeksyon ang mga ilegal na aktibidad ng pagtotroso. Kung may nakahandang sapat na air support ang Philippine National Police (PNP), agad sanang maisasagawa ang deployment (Right now, forest rangers have to trek for two days just to inspect illegal logging activities. If the Philippine National Police (PNP) had proper air support on standby, deployment would be immediate),” ani Tulfo, na nagmula sa Palawan.

Binanggit din niya ang posibilidad na gamitin ang mga helicopter upang mas mabilis na makatugon sa mga emergency sa mga lugar na matindi ang trapiko.

“May plano ba ang PNP na dagdagan ang kanilang mga air asset para sa mas mabilis na pagtugon? Halimbawa, mabigat ang trapiko sa Metro Manila. Mas mabilis ang paggalaw kung may mga air asset (Is there a plan from the PNP to augment air assets for faster response. For instance, there’s heavy traffic in Metro Manila, mobility will be faster if there are air assets),” dagdag ni Tulfo.

Sinuportahan ni Senate Finance Panel Chairperson JV Ejercito ang proposal at iminungkahing ipamahagi ng PNP ang mga helicopter nito sa mahahalagang regional hub sa halip na ituon ang mga ito sa Maynila. Kabilang sa mga lugar na tinukoy niya ang Cebu, Davao at La Union, kung saan maaaring agad na gamitin ang mga helicopter para sa search and rescue, disaster response at medical evacuation.

Sinuportahan din ng mga mambabatas ang pagbili ng mga drone para sa surveillance, ngunit binigyang-diin na kailangan pa rin ang mga helicopter sa mga operasyong nangangailangan ng aktuwal na pagdadala ng mga tauhan o pasyente.

Iminungkahi naman ni DILG Secretary Jonvic Remulla na unahin ng PNP ang mga utility helicopter na idinisenyo para sa tactical drop-off, winching at medical evacuation sa halip na mga executive transport model na walang ganitong kakayahan.

Nanawagan din si Remulla na repasuhin ang sistema ng maintenance ng mga sasakyang panghimpapawid ng PNP matapos ang tatlong helicopter crash sa nakalipas na apat na taon na kinasangkutan ng walong helicopter ng ahensya.

Ayon kay Remulla, maaaring ikonsidera ng PNP ang pag-outsource ng maintenance work upang matiyak na nananatiling airworthy at ligtas gamitin ang mga sasakyang panghimpapawid.

Samantala, sinabi ni Tulfo na susuportahan niya ang hinihinging pondo ng DILG at PNP para sa karagdagang air assets, mga hangar at pagpapahusay ng maintenance system, lalo na upang mapabilis ang pagtugon ng pamahalaan sa mga komunidad sa kanayunan at mga lugar na madalas tamaan ng sakuna.