DOJ pinasasagot si Senador Robin Padilla hinggil sa reklamo ng obstruction of justice

Kinumpirma ng Department of Justice (DOJ) nitong Martes ang pagpapadala ng subpoena kay Senador Robin Padilla at sa kanyang chief of staff na si Col. (ret.) Jean Alla Yasin Robles upang sagutin ang reklamong obstruction of justice.

Ayon kay DOJ spokesperson Polo Martinez, inihatid ang mga subpoena kina Padilla at Robles sa Senado dakong alas-2:30 ng hapon.

Noong Mayo 28, naghain ng reklamo ang Criminal Investigation and Detection Group (CIDG) ng Philippine National Police (PNP) laban kina Padilla at Robles dahil umano sa pagtulong kay Senador Bato Dela Rosa na makatakas matapos ang insidente ng pamamaril sa Senado noong Mayo 13.

Inatasan ang senador at ang kanyang kasamang respondent na humarap sa panel of prosecutors ng DOJ sa Setyembre 25 at Oktubre 9.

Inamin ni Padilla na sumakay si Dela Rosa sa kanyang SUV noong madaling-araw ng Mayo 14. Sinabi niyang hindi naman pugante si Dela Rosa at wala itong arrest warrant noong panahong iyon.

Hinahanap si Dela Rosa ng International Criminal Court (ICC) kaugnay ng mga alegasyon ng crimes against humanity.

Siya ang hepe ng PNP nang ilunsad ng dating Pangulong Rodrigo Duterte noong 2016 ang kampanya laban sa ilegal na droga na nagresulta sa maraming pagkamatay.

Nakadetine si Duterte sa ICC sa The Hague, Netherlands, at nahaharap sa mga kaso ng crimes against humanity kaugnay ng kanyang kampanya laban sa ilegal na droga.