Dating information officer ni VP Duterte: ‘Walang dahilan ang mga Duterte para saktan ako’

Mariing itinanggi ni Jefry Tupas, dating information officer ni Vice President Sara Duterte, ang mga alegasyong ibinato sa kanya ng sinibak na pulis na si Rodulfo Gracioso Jr. sa isang sinumpaang salaysay na isinumite niya sa National Bureau of Investigation (NBI) nitong Huwebes.

Sa pahayag na may petsang Oktubre 1, sinabi ni Tupas na personal na isinumite ng kanyang abogado na si Atty. Toby Diokno ang kanyang affidavit sa punong tanggapan ng NBI sa Maynila.

Kasunod ito ng subpoena ng NBI na nag-aatas kay Tupas na humarap kay NBI Director Melvin Matibag noong Oktubre 1 kaugnay ng imbestigasyon sa posibleng paglabag sa Anti-Plunder Act, Anti-Graft and Corrupt Practices Act at Anti-Money Laundering Act.

Sinabi ni Tupas na bago niya matanggap ang subpoena, nagtungo sa kanyang tahanan noong madaling araw ng Setyembre 29 ang mga tauhan ng NBI na nagpakilalang bahagi ng tanggapan ng Special Assistant for Mindanao Concerns.

Ayon sa kanya, ipinaalam sa kanya ng mga ito na nakatukoy ang NBI ng isang “mapapatunayang banta” sa kanyang buhay.

Nag-alok ang NBI ng security protection para sa kanya at sa kanyang pamilya, ngunit tumanggi si Tupas.

Sinabi rin niyang personal siyang tinawagan ni Matibag para pag-usapan ang sitwasyon sa seguridad at hiniling na makipagkita siya nang personal sa Maynila.

“Iminungkahi ko na magpadala na lamang ang NBI ng pormal na imbitasyon (I explicitly requested that the NBI send me a formal invitation instead),” ani Tupas.

Gayunman, sinabi niyang sa halip na imbitasyon kaugnay ng usapin sa seguridad, subpoena na may petsang Setyembre 28 ang natanggap niya mula sa NBI para hingan ng pahayag tungkol sa imbestigasyon sa graft, plunder at money laundering.

Samantala, tinawag ni Tupas na “katawa-tawa” at “lubhang kasuklam-suklam” ang mga nilalaman ng affidavit ni Gracioso na inilabas sa publiko, at iginiit na madaling mapapabulaanan ang mga ito gamit ang mga aktuwal na detalye.

Itinanggi rin niya ang paratang na may banta sa kanyang buhay mula kay Vice President Duterte o sa kanyang pamilya.

“Kumpyansa ako na walang dahilan ang mga Duterte para saktan ako (I am confident that the Dutertes have no reason to cause me any harm),” giit ni Tupas.

Gayunman, sinabi ni Tupas na nababahala siya sa kaligtasan ng kanyang pamilya matapos lumabas ang ulat tungkol sa umano’y banta sa kanya.

Ayon sa kanya, may mga kahina-hinalang indibidwal na namataan malapit sa mga tirahan at pinagtatrabahuhan ng kanyang pamilya, na kasalukuyang idinodokumento ng kanyang legal team.

“Isa na akong pribadong mamamayan, at ang tanging nais ko ay huwag akong gamitin bilang sangla, kasangkapan o leverage sa mga hakbang para usigin si Ms. Sara Z. Duterte at ang pamilya Duterte (I am now a private citizen, and my only wish is to be spared from being used as a pawn, tool, or leverage in schemes to persecute Ms. Sara Z. Duterte and the Duterte family),” ani Tupas.

Umaasa rin siya na pahihintulutan siyang mamuhay nang tahimik at simple, malayo sa kaguluhan ng politika.

Samantala, iniimbestigahan pa ng mga awtoridad ang mga alegasyon ni Gracioso. Sinabi ng NBI na ibe-verify nito ang mga pahayag at ebidensiyang isinumite kaugnay ng mga umano’y paghahatid ng pera sa mga miyembro ng pamilya Duterte.