California at anim na iba pang estado, nagsampa ng kaso laban sa administrasyong Trump dahil sa pagpigil ng pondo

Nagsampa noong Miyerkules ang California at anim pang estado ng kaso laban sa administrasyong Trump dahil sa umano’y pagpigil nito sa mga pondong pederal na inaprubahan ng Kongreso, kabilang ang humigit-kumulang $810 milyon na ipinasyang kanselahin ng White House bago matapos ang fiscal year.

Noong nakaraang linggo, tinangka ni US President Donald Trump na unilateral na pigilan ang mga pondong inaprubahan ng Kongreso para sa mga programa kaugnay ng imigrasyon, panlahi at edukasyon. Gumamit ang White House ng teknik na tinatawag na “pocket rescission” para rito.

Nagdulot ang kaso ng panibagong legal na pagtatalo tungkol sa limitasyon ng kapangyarihan ng pangulo sa paggastos ng pondo ng gobyerno.

Sa ilalim ng “pocket rescission,” humihiling ang pangulo sa Kongreso na kanselahin ang mga pondo sa panahong malapit nang matapos ang fiscal year, kaya nag-e-expire ang mga ito bago pa makakilos ang mga mambabatas.

Nakatanggap ng batikos mula sa parehong partido ang hakbang dahil umano sa pagtatangkang iwasan ang kapangyarihang konstitusyonal ng Kongreso sa pagkontrol sa paggastos ng pederal na pamahalaan.

Nakasaad sa kaso, na inihain sa US District Court for the Northern District of California  at pinangunahan ni California Attorney General Rob Bonta, na ang pagtanggi ng administrasyon na gastusin ang mga pondong inilaan ay lumalabag sa mga probisyon ng Konstitusyon hinggil sa paghihiwalay ng kapangyarihan, paglalaan ng pondo at presentment.

“Patuloy akong nababahala sa lantad na pagwawalang-bahala ni President Trump sa pangunahing balangkas ng Konstitusyon ng ating pamahalaan. Dahil lamang ayaw ng pangulo sa isang programa ay hindi nangangahulugang maaari niya itong alisin sa pondo (I continue to be appalled by President Trump’s blatant disregard for the basic Constitutional framework of our government. Just because the President doesn’t like a program doesn’t mean he can defund it),” sabi ni Bonta sa isang pahayag.

Ibinibigay ng Konstitusyon sa Kongreso ang kapangyarihan sa paglalaan at pagkontrol ng pondo ng pamahalaan, ngunit sinabi ng White House noong nakaraang linggo na sinusuportahan ng mga naturang programa ang ilegal na imigrasyon, nagpapalala ng tensiyong panlahi at nagtataguyod ng mga nakakaalarmang pananaw tungkol sa kapaligiran.

Iginiit ng mga estado sa kanilang kaso na sinisira ng mga hakbang ng administrasyong Trump para pigilan ang mga pondong pederal ang eksklusibong kapangyarihan ng Kongreso na kontrolin ang paggastos ng pamahalaan.

Hindi agad nakuhanan ng komento ang White House sa labas ng regular na oras ng trabaho.