Associate Justice Midas Marquez, inirekomenda bilang punong mahistrado ng Supreme Court

Inirekomenda ni retiradong Supreme Court (SC) Associate Justice Arturo Brion si Associate Justice Midas P. Marquez bilang susunod na punong mahistrado ng bansa.

Aabot sa mandatory retirement age na 70 si SC Chief Justice Alexander Gesmundo at magreretiro sa Nobyembre 6, 2026.

Sa kanyang liham sa Judicial and Bar Council (JBC), binanggit ni Brion ang mga naging ambag ni Marquez sa pagpapahusay ng operasyon ng mga korte sa loob ng kanyang 11 taong panunungkulan bilang Court Administrator, na nagsimula noong Enero 2010.

Nagsilbi rin si Marquez bilang chief of staff ni dating Chief Justice Reynato Puno, hepe ng Public Information Office, at tagapagsalita ng Korte Suprema.

“Nasaksihan ko mismo ang huwarang etika sa trabaho at dedikasyon sa serbisyo publiko ni Associate Justice Marquez noong ako ay nasa Korte, partikular noong nagsilbi siya bilang Court Administrator (I had the privilege of witnessing Associate Justice Marquez’ exemplary work ethic and dedication to public service during my tenure in the Court, particularly while he served as Court Administrator),” sabi ni Brion sa kanyang liham.

“Ang kanyang napakahalagang ambag sa Hudikatura, lalo na sa pagpapahusay ng operasyon ng mga korte at pagbibigay ng epektibong pamumuno sa mga hukom at kawani ng korte, ay walang alinlangang nagpatibay sa pangangasiwa ng katarungan (His invaluable contribution to the Judiciary, especially in improving court operations and providing effective leadership to judges and court personnel, have undoubtedly strengthened the administration of justice),” dagdag niya.

Si Marquez, na namumuno sa SC Committee on Virtual Hearings and Electronic Testimony, ang nanguna sa paggamit ng videoconferencing para sa mga paglilitis at iba pang court proceedings noong kasagsagan at matapos ang COVID-19 pandemic.

Inilarawan ni Brion si Marquez bilang “isang taong napatunayan na ang kakayahan, integridad, katapatan, at pagiging malaya sa pagpapasya.”

“Ang mga katangiang ito, kasama ng kanyang malawak na karanasan sa judicial adjudication at court administration, ay ginagawa siyang lubos na kwalipikadong mamuno sa Supreme Court at sa buong Hudikatura (These qualities, together with his extensive experience in both judicial adjudication and court administration, make him exceptionally qualified to lead the Supreme Court and the entire Judiciary,” sabi ni Brion.

Bukod kay Brion, iniendorso rin ng Association of Retired Regional Trial Court Judges of the Philippines si Marquez sa JBC para sa posisyon ng punong mahistrado.