Vessel traffic sa Strait of Hormuz, bumaba sa lima kada araw nitong weekend

Bumaba na sa lima kada araw ang bilang ng mga dumadaang barko na may kargang kalakal sa Strait of Hormuz nitong weekend, base sa shipping data nitong Lunes. Ito ay bunsod pa rin ng pag-iingat ng mga shipping company sa gitna ng banta ng pag-atake sa mga barko.

Gayunman, maaaring mas mataas pa sa lima ang aktuwal na bilang ng mga barkong dumaraan sa lugar dahil may ilang vessel na nagpapatay ng kanilang automatic identification system (AIS) para sa kanilang kaligtasan.

Limitado sa maliliit na barko ang mga dumaan sa Strait of Hormuz nitong weekend, ayon sa datos ng commodities firm na Kpler. Kabilang dito ang dalawang liquefied petroleum gas (LPG) carrier. Ayon sa ulat, ang isa ay lumabas sa Strait of Hormuz sa rutang dumaraan sa Iran, habang ang isa naman ay naglayag sa dilim, patungong India.

Nitong Biyernes, 14 na barko ang dumaan sa lugar, kabilang ang isang napakalaking crude carrier na may kargang 2 milyong bariles ng langis mula Qatar. Lumabas ito sa Strait of Hormuz na nakapatay ang transponder nito.

Iniulat naman ng United Kingdom Maritime Trade Operations noong Linggo na isang tanker ang tinamaan ng hindi pa natutukoy na projectile habang patungo sa loob ng Strait of Hormuz noong Sabado.

Ito na ang ikatlong pag-atake sa kipot na iniulat ng naturang ahensiya sa nakalipas na isang linggo.

Lalong tumaas ang tensyon sa Gulf matapos magsagawa ang U.S. forces ng pag-atake laban sa dalawang Iranian launcher sa Larak Island ng Iran sa Strait of Hormuz noong Linggo. Ito ang unang naiulat na pag-atake ng Estados Unidos sa Gulf nation mula noong huling bahagi ng Hulyo.