Trump, hindi tutol sa pagtatayo ng mga pabrika ng Chinese automakers sa US

WASHINGTON — Sinabi nitong Biyernes ni Pangulong Donald Trump na hindi siya tutol sa pagtatayo ng mga pabrika ng mga Chinese automaker sa United States, sa kabila ng malawakang pagtutol dito ng mga mambabatas at kompanya ng sasakyan sa Amerika.

“Kung gusto ng China na pumasok at magbukas ng planta para gumawa ng kanilang mga sasakyan dito, ayos lang sa akin (If China wanted to come in and open a plant to build their cars here, I'd be okay with that),” ani Trump sa isang panayam sa programang “The Ingraham Angle” ng Fox News.

“Ginagawa ito ng Japan, pero kumukuha sila ng ating mga manggagawa. Ang pinakamahalaga ay kumukuha sila ng ating mga manggagawa (Japan does it, but they hire our people. The big thing is they hire our people),” dagdag niya.

Sinabi rin ni Trump na ayaw niyang magtayo ng mga sasakyan ang Chinese automakers sa Mexico at saka ipadala ang mga ito sa United States.

“Hindi ko minamaliit ang mga sasakyang gawa ng China (I'm not knocking Chinese cars),” ani Trump.

Hinimok ng mga automaker sa Amerika si Trump, na nakatakdang makipagkita kay Chinese President Xi Jinping sa Washington sa susunod na linggo, na huwag payagan ang mga Chinese automaker na makapasok sa US market.

Nitong Miyerkules, sinabi ni US Senator Elissa Slotkin, Democrat mula Michigan, na may mga “usap-usapan” na plano umanong payagan ni Trump ang pagbebenta ng mga sasakyang gawa ng China sa US bilang bahagi ng mas malawak na kasunduang binubuo ng kanyang administrasyon. Ani Slotkin, magiging “strategic mistake” ang naturang hakbang.

Tinawag naman ni Trump na “total phony rumor” o ganap na pekeng usap-usapan ang pahayag ni Slotkin at sinabing hindi niya pinapayagan ang mga Chinese vehicle na makapasok sa United States.

Isang regulasyong ipinatupad ng administrasyon ni dating Pangulong Joe Biden noong unang bahagi ng 2025 ang epektibong nagbabawal sa mga Chinese automaker na magbenta o gumawa ng mga passenger vehicle sa US. Nagpapatupad din ang Washington ng mahigit 100 porsiyentong taripa sa mga electric vehicle na gawa sa China.

Noong nakaraang linggo, hinimok ng isang grupo na kumakatawan sa halos lahat ng pangunahing automaker sa Amerika ang Kongreso na agad magpasa ng batas na permanenteng magbabawal sa mga sasakyang gawa ng China sa US market.

Nanawagan ang Alliance for Automotive Innovation, na kumakatawan sa General Motors, Ford, Toyota, Volkswagen, Hyundai, Honda, Stellantis at iba pang pangunahing automaker, na maipasa ang panukala bago matapos ang Disyembre.

“Sa ngayon, naglalabas ang mga Chinese automaker ng mga sasakyang may subsidiya na may konektadong software at hardware sa iba’t ibang bahagi ng mundo (Right now, Chinese automakers are dumping subsidized vehicles with connected software and hardware around the world),” ayon kay John Bozzella, CEO ng grupo, sa isang liham para sa mga lider ng Kongreso.