Tinatayang 1.1 milyong manggagawa sa Metro Manila, tatanggap ng P60 dagdag-sahod sa Setyembre 26

Makatatanggap ng P60 dagdag-sahod kada araw ang mga minimum wage earner sa National Capital Region (NCR), na epektibo sa Setyembre 26.

Sa isang pahayag, sinabi ng Department of Labor and Employment (DOLE) na itinaas ng Wage Order NCR-28, na inilathala nitong Biyernes at magkakabisa makalipas ang 15 araw, ang minimum wage ng mga non-agricultural worker mula P695 tungo sa P755 at ng mga agricultural worker mula P658 tungo sa P718.

Inilabas ng Regional Tripartite Wages and Productivity Board-NCR ang wage order alinsunod sa itinakdang proseso ng tripartite wage-setting.

Pinaalalahanan ng DOLE ang mga employer na sumunod sa bagong wage rates sa oras na magkabisa ang mga ito, at tiniyak sa mga manggagawa na imo-monitor ng kagawaran ang pagpapatupad nito.

Tinatayang 1.1 milyong daily wage earner sa Metro Manila ang makikinabang sa dagdag-sahod, batay sa datos ng DOLE.

Ang dagdag-sahod ay bahagi ng pagtupad sa pangako ni Pangulong Ferdinand R. Marcos Jr. na mapabuti ang purchasing power ng mga manggagawa at maisulong ang inklusibong paglago ng ekonomiya.