Taiwan labor minister, bumiyahe sa China para sa APEC event

TAIPEI — Bumiyahe patungong China noong Linggo ang Taiwan labor minister na si Hung Sun-han para dumalo sa isang APEC event, ang unang ministerial-level visit sa China sa ilalim ng administrasyon ni President Lai Ching-te. Ito’y ginaganap habang patuloy na pinaiigting ng Beijing ang military at political pressure nito laban sa Taipei.

Ang Asia-Pacific Economic Cooperation o APEC ay isa sa iilang international organization na kinabibilangan ng Taiwan, habang China naman ang host country ngayong taon. Gaganapin sa Shenzhen sa Nobyembre ang APEC leaders summit.

Tinanggihan ng China ang mga alok ni Lai na makipag-usap at tinawag siyang "separatist."

Halos araw-araw ding nagsasagawa ng military operations ang China sa paligid ng Taiwan. Iginiit naman ni Lai na tanging mga mamamayan ng Taiwan ang maaaring magpasya sa kanilang kinabukasan.

Kinumpirma ng Taiwan labor ministry na bumiyahe na si Hung patungong China para dumalo sa APEC human resources ministerial meeting sa Nanjing.

Hindi nagbigay ng karagdagang detalye ang ministry, habang hindi rin nagsalita si Hung sa mga reporter sa airport bago ang kanyang pag-alis.

Ayon sa China Taiwan Affairs Office, pinangangasiwaan nito ang paglahok ng Taiwan sa APEC alinsunod sa mga patakaran ng APEC at sa "One China principle," na kumikilala sa Taiwan bilang bahagi ng teritoryo ng China.

Dati nang mambabatas si Hung para sa ruling Democratic Progressive Party ni Lai at naging aktibo sa mga usapin tulad ng human rights sa Hong Kong at Tibet.

Lumalahok ang Taiwan sa APEC sa ilalim ng pangalang "Chinese Taipei," na ginagamit din nito sa Olympics. Samantala, karaniwang ginagamit ng China ang terminong "China Taipei," na tinututulan ng pamahalaan ng Taiwan.

Dumalo na rin sa iba pang APEC events sa China ang ilang Taiwanese officials na nasa mas mababang posisyon. Itinuturing ng China ang Taiwan bilang isa sa mga lalawigan nito at hindi bilang isang hiwalay na bansa.

Hindi dumadalo ang pangulo ng Taiwan sa APEC leaders summit upang maiwasan ang mga isyung pulitikal. Sa halip, nagpapadala ang Taiwan ng mga dating opisyal o business leaders, gaya ni Morris Chang, founder ng chip giant na TSMC.

Hindi pa inaanunsyo ng Taiwan kung sino ang dadalo sa APEC leaders summit sa Shenzhen.