Sen. Pangilinan, kinuwestiyon ang planong pag-aangkat ng bigas mula sa US

Hinimok ni Sen. Francis “Kiko” Pangilinan ang pamahalaan na masusing pag-aralan ang panukalang pag-aangkat ng bigas mula sa Estados Unidos.

Ayon kay Pangilinan, dapat bawasan ng pamahalaan ang gastos sa produksyon ng palay upang maging mas kompetitibo ang lokal na bigas nang hindi nalalagay sa alanganin ang kabuhayan ng mga magsasakang Pilipino.

“Hindi dapat magsasaka ang sumalo ng lahat ng sakripisyo para lamang bumaba ang presyo ng bigas. Ang kailangan ay bawasan ang gastos at pagkalugi sa buong supply chain upang parehong makinabang ang nagtatanim at ang bumibili,” aniya.

“Ang pangmatagalang layunin natin: may sapat na kita ang magsasaka at may abot-kayang bigas ang bawat pamilya. Dito dapat nakatuon ang pondo, programa, at pagkilos ng gobyerno,” dagdag niya.

Bilang tagapangulo ng Senate Committee on Agriculture, Food, and Agrarian Reform, kinuwestiyon ni Pangilinan ang pagiging praktikal ng pag-aangkat ng bigas mula sa Amerika dahil sa posibleng mataas na gastos sa pagbili at pagpapadala nito.

Nagbabala siya na maaaring sa huli ay mga mamimili ang sasagot sa karagdagang gastusin.

Nagmula ang panukalang pag-aangkat sa memorandum of understanding na nilagdaan ng Philippine Rice Industry Stakeholders Movement (PRISM) at USA Rice, na naglalayong mag-angkat ng 100,000 metriko tonelada ng bigas sa 2027 at 200,000 metriko tonelada kada taon simula 2028.

Layunin ng plano na makatulong na punan ang kakulangan sa pagitan ng lokal na produksyon ng bigas at pambansang pangangailangan, gayundin ang pagpapanatili ng sapat na suplay nito.

Kinilala ni Pangilinan ang pangangailangang mag-angkat ng bigas upang matugunan ang kakulangan sa produksyon, ngunit iginiit niyang dapat itong sabayan ng mga hakbang upang maging mas kompetitibo ang lokal na bigas.

“Hindi pa sapat ang ating produksyon para sa pangangailangan ng buong bansa, kaya kailangan pa rin nating mag-angkat. Ngunit habang pinupunan natin ang kakulangan, dapat mas tutukan ng gobyerno ang pagpapababa ng gastos sa pagtatanim, pag-aani, pagpapatuyo at paggiling ng sarili nating palay,” aniya.

Sinabi ng senador na makatutulong ang pagpapababa ng gastos ng mga magsasaka at pagpapahusay ng mga proseso matapos ang anihan upang mapataas ang kanilang kita at makatulong sa pagpapababa ng presyo ng bigas sa merkado.

Pangungunahan ni Pangilinan sa susunod na linggo ang pagdinig ng Senado sa panukalang badyet ng Department of Agriculture (DA) at mga ahensiyang nasa ilalim nito, kung saan maaaring talakayin ang pondong ilalaan sa mga hakbang upang palakasin ang lokal na produksyon ng bigas.

Kabilang sa mga prayoridad na isinusulong niya ang pamumuhunan sa maaasahang mga sistema ng irigasyon, de-kalidad na binhi, makinaryang pansakahan, abot-kayang pautang, at mga pasilidad para sa pagpapatuyo, pag-iimbak at paggiling ng palay.

Nanawagan din siya na palakasin ang mga kooperatiba ng magsasaka, magbigay ng praktikal na tulong teknikal, at magpatupad ng mga hakbang upang mabawasan ang pagkalugi matapos ang anihan at ang hindi kinakailangang gastos sa transportasyon.

Hinimok ni Pangilinan ang pamahalaan na mahigpit na ipatupad ang Sagip Saka Act na kanyang iniakda. Pinahihintulutan ng batas ang mga pambansang ahensiya ng pamahalaan at mga lokal na pamahalaan na direktang bumili ng mga produktong agrikultural at pangisdaan mula sa mga magsasaka at mangingisda nang hindi dumaraan sa public bidding.

Sinabi niyang dapat samahan ng mga hakbang upang mapataas ang produksyon ng sektor ng agrikultura ang mga probisyon ng batas na naglalayong palawakin ang access ng mga magsasaka sa merkado.

Isinusulong din ng senador ang pagpasa ng mga nakabinbing panukalang batas para palakasin ang mga kooperatiba sa agrikultura at ibalik sa pangangasiwa ng pambansang pamahalaan ang mga serbisyong pang-extension sa agrikultura.

Layunin ng mga panukalang ito na mapabuti ang access ng mga magsasaka sa tulong teknikal at iba pang suportang kailangan nila.