PSEi, umangat kasabay ng bahagyang paglakas ng piso laban sa dolyar

Nagpatuloy ang pag-angat ng Philippine Stock Exchange index (PSEi) nitong Miyerkules dahil sa bargain-hunting ng mga investor, kasabay ng bahagya ring paglakas ng Philippine peso laban sa U.S. dollar.

Umakyat ng 0.17 porsiyento ang pangunahing index ng lokal na stock market sa 6,116.53 puntos, habang nadagdagan naman ng 0.04 porsiyento ang mas malawak na All Shares index sa 3,385.85 puntos.

Kalahati sa mga sectoral gauge ay sumunod sa pagtaas, kabilang ang Services na umakyat ng 1.59 porsiyento; Mining and Oil, 0.55 porsiyento; at Industrial, 0.05 porsiyento.

Samantala, bumaba ang Holding Firms ng 1.29 porsiyento, Property ng 0.82 porsiyento, at Financials ng 0.12 porsiyento.

Umabot sa halos 940 milyong shares ang trading volume, na nagkakahalaga ng PHP5.9 bilyon.

Nanguna ang mga bumagsak na stocks sa mga umakyat, 106 laban sa 88, habang 55 shares naman ang hindi nagbago.

Ayon kay Luis Limlingan, head of sales ng Regina Capital Development Corporation, nanatiling maingat ang trading habang nakatuon ang mga investor sa piling malalaking kumpanya sa index.

“Bahagyang mas mataas na nagsara ang lokal na index habang nanatiling maingat ang trading, kung saan patuloy na nakatuon ang mga investor sa piling malalaking kumpanya sa index. Bumuti rin ang sentimyento sa merkado matapos bahagyang lumakas ang Philippine peso laban sa U.S. dollar (The local index closed slightly higher as trading remained cautious, with investors continuing to focus on selected index heavyweights. Market sentiment also improved as the Philippine peso showed some relief against the US dollar),” sabi ni Limlingan.

Gayunman, iginiit din niyang limitado pa rin ang potensiyal na pag-angat ng merkado dahil nananatiling mapili ang mga investor sa gitna ng umiiral na mga kawalang-katiyakan sa ekonomiya.

Samantala, lumakas ang lokal na currency matapos magsara ang trading sa 62.51 piso kada U.S. dollar, mula sa 62.62 noong Martes.

Nagbukas ang piso sa 62.50 at gumalaw sa pagitan ng 62.43 at 62.55. Umabot naman sa 62.48 ang average exchange rate para sa araw.

Umabot sa USD1.68 bilyon ang trading volume, mas mataas kumpara sa USD1.39 bilyon noong nakaraang araw.