Presyo ng mga pangunahing bilihin sa Pilipinas, mananatiling stable hanggang katapusan ng 2026 — DTI

Hindi magbabago hanggang sa katapusan ng 2026 ang presyo ng mga pangunahing bilihin na sakop ng government monitoring, sa kabila ng mabilis na galaw ng inflation o antas ng pagtaas ng presyo ng mga bilihin. Ito ang tiniyak ni Trade Secretary Ma. Cristina Roque nitong Huwebes, Nobyembre 5.

Ayon kay Roque, walang inaasahang pagtaas ng presyo sa 190 stock-keeping units o mga produktong nakalista sa programa ng Department of Trade and Industry (DTI) para sa basic necessities and prime commodities. Kabilang sa mga produktong ito ang mga de-latang isda, processed milk, kape, tinapay at sabon panlaba, ayon sa ulat ng Philippine News Agency.

Ang pahayag ay kasunod ng ulat ng Philippine Statistics Authority na bumilis sa 7.8 porsiyento ang inflation noong Oktubre, mula sa 7.2 porsiyento noong Setyembre. Dahil dito, umabot sa 5.6 porsiyento ang average inflation mula Enero hanggang Oktubre, mas mataas sa target range ng Bangko Sentral ng Pilipinas na dalawa hanggang apat na porsiyento.

Sinabi ni Roque na tinutulungan ng pamahalaan ang mga negosyo na makayanan ang epekto ng inflation sa pamamagitan ng pagpapalawak ng access sa pautang at pagbubukas ng mas maraming oportunidad sa merkado.

Binanggit niya ang mga loan program ng Small Business Corporation (SBCorp) na naglalayong tulungan ang mga estudyante, kababaihang negosyante at mga overseas Filipino worker (OFW) na nagbabalik sa bansa, bukod sa iba pa. Target ng SBCorp na makapagpalabas ng kabuuang 12 bilyong piso na pautang ngayong taon.

Dagdag pa ni Roque, nagsisikap din ang pamahalaan na palakasin ang demand para sa mga lokal na produkto at iniluluwas sa ibang bansa sa pamamagitan ng pag-uugnay sa mga negosyo sa mas maraming oportunidad sa merkado.

Sari Story Network, batay sa ulat ng Philippine News Agency (PNA)