Presyo ng LPG sa Pilipinas, inaasahang bababa ngayong Setyembre

Inaasahang bababa ng PHP0.40 kada kilo ang presyo ng liquefied petroleum gas (LPG) sa Pilipinas ngayong Setyembre, matapos bumaba ang gastos sa pagbiyahe nito, na nakatulong para maibsan ang pagtaas ng international contract prices, ayon sa Department of Energy (DOE) nitong Martes.

Sa isang news release, sinabi ng DOE na makatitipid ng PHP4.40 sa LPG expenses ngayong buwan ang mga pamilyang gumagamit ng 11-kilogram na LPG cylinder.

Tumaas sa USD649.50 kada metric ton ang international LPG contract price ngayong buwan mula sa USD634 noong Agosto. Samantala, bumaba naman ang freight cost mula USD120.82 tungo sa USD94.41 kada metric ton.

Nakatulong din sa pagbaba ng presyo ng LPG sa bansa ang paglakas ng piso laban sa US dollar, na umangat sa PHP61.40 noong Agosto mula sa PHP61.59 noong Hulyo.

Ayon pa sa DOE, inaasahang maglalaro sa PHP1,031 hanggang PHP1,536 ang presyo ng isang 11-kilogram na LPG cylinder, depende sa brand at lokasyon.

“For families who rely on LPG to prepare their meals every day, every peso saved can go toward other household needs. The reduction may be modest, but consumers should benefit whenever market conditions bring costs down,” ani Energy Secretary Sharon Garin.

Para sa mga pamilyang umaasa sa LPG sa kanilang pang-araw-araw na pagluluto, sinabi ni Garin na makatutulong ang bawat pisong matitipid para magamit sa iba pang pangangailangan ng tahanan.

Bagama't maliit lamang ang inaasahang bawas, dapat aniyang makinabang ang mga mamimili kapag bumababa ang mga gastusin dahil sa kondisyon ng merkado.