Presyo ng langis sa PH, tataas ng ₱4.69 hanggang mahigit ₱5 kada litro ngayong linggo

Nagresulta sa pagtaas nang mahigit ₱5 kada litro sa presyo ng mga produktong petrolyo sa bansa ngayong linggo ang paglala ng mga operasyong militar sa Middle East, kasabay ng pangkalahatang paghina ng piso.

Batay sa datos na inilabas ng Department of Energy (DOE) nitong Lunes, tataas nang hanggang ₱4.69 kada litro ang presyo ng gasolina, habang aakyat naman ng ₱5.18 kada litro ang diesel at ₱5.58 kada litro ang kerosene.

“Simula bukas, magpapatupad ang mga kompanya ng langis ng dagdag-presyo, may oil price hike po tayo bukas sa mga presyo ng produktong petrolyo sa bansa, na pangunahing dulot ng mas mataas na pandaigdigang presyo ng langis kasunod ng panibagong tensiyon na nakaaapekto sa daloy ng enerhiya sa Middle East,” sinabi ni Energy Secretary Sharon Garin sa isang online briefing nitong Lunes.

(Beginning tomorrow, oil companies will implement upward adjustments, may oil price hike po tayo bukas (we will have an oil price hike tomorrow) in domestic petroleum prices, driven largely by higher international oil prices following renewed tensions affecting energy flows through the Middle East.)

Ipinaliwanag ni Garin na kabilang sa mga dahilan na nagtutulak sa pagtaas ng presyo ang paghina ng piso, dahil gumagamit ng dolyar ang mga lokal na kompanya sa pagbili ng mga produktong langis mula sa ibang bansa.

Inanunsyo naman ng ilang kompanya ng langis sa magkakahiwalay na abisong inilabas nitong araw na ipatutupad ang mga pagbabago sa presyo alas-6 ng umaga nitong Martes.

Iniulat ng Jetti Petroleum na tataas ng ₱5.10 kada litro ang presyo ng diesel at ₱4.60 kada litro naman ang gasolina.

Ayon sa Seaoil, tataas ng ₱4.69 kada litro ang presyo ng kanilang mga produktong gasolina, ₱5.18 kada litro ang diesel, at ₱5.58 kada litro ang kerosene.

Iniulat naman ng Petron Corporation na tataas ng ₱4.70 kada litro ang presyo ng gasolina, ₱5.20 kada litro ang diesel, at ₱5.60 kada litro ang kerosene.

Tulong sa kita

Sa kabila ng mga hamon, tiniyak ni Garin na patuloy na makatatanggap ng diskuwento ang mga kuwalipikadong driver ng public utility vehicle (PUV) na benepisyaryo ng subsidiya ng pamahalaan, na nagkakahalaga ng ₱12 kada litro hanggang sa maximum na ₱1,800 kada linggo.

“Ang mahalaga sa huli ay kung magkano ang matitira para sa pagkain, kuryente, gastusin sa paaralan, at iba pang pangangailangan ng pamilya,” aniya.

(What matters at the end of the day is how much remains for food, electricity, school expenses, and other family needs.)

Tiniyak din ni Garin sa publiko na sapat ang suplay ng langis sa bansa.

“Ang maaari nating gawin ay panatilihing sapat ang suplay sa bansa, masusing suriin ang paggalaw ng presyo, ipatupad ang mga kinakailangan sa imbentaryo, at magbigay ng tulong kung saan maaaring makatulong ang pamahalaan upang mabawasan ang pasanin ng ating mga konsyumer,” dagdag niya.

(What we can do is maintain an adequate domestic supply, scrutinize price movements, enforce our inventory requirements, and provide assistance where the government can help ease the burden on our consumers.)