Palasyo, nanawagan ng mapayapang dayalogo kasunod ng protesta ukol sa Pax Silica

Nanawagan ang Malacañang nitong Biyernes sa mga grupong may mga agam-agam at pagtutol sa Pax Silica initiative na isulong ang mapayapang dayalogo sa halip na gumamit ng karahasan sa mga protesta.

Iginiit ni Palace Press Officer Claire Castro ang panawagan matapos ang girian sa pagitan ng mga kabataang nagpoprotesta at mga pulis sa Luzon Economic Corridor (LEC) Investment Forum sa Grand Hyatt Manila sa Taguig City nitong Huwebes, na dinaluhan ni Pangulong Ferdinand R. Marcos Jr.

Sa isang press conference sa Philippine Embassy sa New Delhi, India, binigyang-diin ni Castro na bagama’t iginagalang ni Marcos ang kalayaan sa pagpapahayag, dapat iwasan ng mga nagpoprotesta ang mga aksyong maaaring makapanakit o humantong sa karahasan.

“Ang Pangulo po ay kinikilala at iginagalang ang freedom of expression. Pero hindi po sa pamamaraang maaari kayong makapanakit o maaari pong dumaan ito o magdulot ng karahasan (The President recognizes and respects freedom of expression. But it should not be exercised in a manner that could hurt others or lead to or cause violence),” sabi ni Castro.

Uminit ang sitwasyon nang tangkain ng mga nagpoprotesta na tutol sa Pax Silica initiative na pumasok sa hotel.

Binigyang-diin ni Castro na hindi makatutulong sa pag-unawa o paglutas sa mga isyung ibinabato ng mga nagpoprotesta ang pagsigaw at paggamit ng karahasan.

Hinimok niya ang mga nagpoprotesta na lumapit sa mga kinauukulang ahensya ng pamahalaan upang ihayag ang kanilang mga alalahanin.

“Hindi po ito parte ng isang freedom of expression. Kung mayroon silang nais na ipabatid patungkol sa issue ng Pax Silica, bukas ang ahensya ng pamahalaan na concerned dito sa project ng Pax Silica (This is not part of freedom of expression. If they have something they want to communicate regarding the Pax Silica issue, the government agency concerned with the Pax Silica project is open to them),” ayon kay Castro.

“Hindi masusulusyonan ang issue ninyo sa pamamagitan ng mararahas na pagpoprotesta. Tayo po ay bansa na gumagamit ng tamang pag-e-evaluate, tamang pag-iisip, tamang pagdedesisyon (Your issues will not be resolved through violent protests. We are a country that believes in proper evaluation, proper thinking, and proper decision-making),” dagdag pa niya.

Ang Pax Silica, na isang proposed high-tech manufacturing at innovation hub sa ilalim ng LEC, ay naglalayong gawing mahalagang bahagi ang Pilipinas ng pandaigdigang supply chains para sa semiconductors, artificial intelligence, at critical minerals.

Itatayo ang proyekto sa New Clark City sa Capas, Tarlac, at inaasahang makalilikha ng hanggang 190,000 de-kalidad na trabaho para sa mga Pilipino.

Kapag ganap nang nabuo, maaaring makahikayat ang inisyatiba ng tinatayang US$40 bilyon hanggang US$70 bilyong investments. Magbubukas din ito ng mga oportunidad para sa mga Filipino engineer, researcher, computer science graduate, at iba pang highly skilled professional na makapagpatayo ng kanilang karera sa Pilipinas.