GLOBAL MARKETS: AI boom nagpasigla sa produksyon ng mga pabrika sa Asia

TOKYO — Lumago ang aktibidad ng mga pabrika sa buong Asia noong Setyembre dahil sa pandaigdigang pag-unlad ng artificial intelligence (AI), ayon sa mga pribadong survey nitong Huwebes.

Nagbigay ito ng kaunting ginhawa sa mga policymakers na nangangamba sa patuloy na pagtaas ng mga gastusin na dulot ng digmaan ng US at Israel laban sa Iran.

Bagama’t nakaapekto sa pananaw sa pandaigdigang ekonomiya ang panibagong pagtaas ng presyo ng enerhiya, nakapagtala ng paglago sa manufacturing activity ang Japan, South Korea at Taiwan dahil sa matatag na demand para sa mga chip at produktong may kaugnayan sa AI.

Iniulat din noong Miyerkules ng mga survey na lumago ang factory activity sa China noong nakaraang buwan matapos makabalik sa operasyon ang mga pabrika dahil sa pagbuti ng lagay ng panahon.

Pinakamalaki sa loob ng apat na buwan ang paglago ng factory activity sa South Korea noong Setyembre dahil lumakas ang demand sa exports, na umabot sa pinakamabilis na antas sa loob ng 15 at kalahating taon.

“Parehong umabot sa pinakamataas sa loob ng humigit-kumulang limang taon at kalahati ang paglago ng bagong orders at produksyon, kung saan madalas na iniuugnay sa lakas ng sektor ng semiconductors at automotive ang paglawak ng aktibidad (Both new orders and production growth hit the highest for around five-and-a-half years, with anecdotal evidence often linking the expansions to the combined strength of the semiconductor and automotive sectors),” ani Usamah Bhatti, economist sa S&P Global Market Intelligence, tungkol sa South Korea.

Umabot sa 53.9 ang purchasing managers’ index (PMI) ng South Korea na inilabas ng S&P Global noong Setyembre, mula 52.3 noong Agosto. Ito ang pinakamataas na antas mula Mayo.

Nanatili sa mahigit 50 ang index, na siyang naghihiwalay sa paglago at pag-urong ng aktibidad, sa loob ng 10 magkakasunod na buwan.

Samantala, umabot sa 56.7 ang PMI ng Taiwan noong Setyembre, mula 54.7 noong Agosto, habang patuloy na nakikinabang ang bansa sa pandaigdigang pag-unlad ng AI.

Umabot naman sa 54.1 ang S&P Global PMI ng Japan noong Setyembre, mas mababa sa 54.9 noong Agosto at pinakamabagal na paglago sa loob ng anim na buwan dahil humina ang produksyon at bagong orders.

Sa kabila nito, nanatiling malakas ang overseas demand, kung saan tumaas ang bagong export orders sa ikasiyam na sunod na buwan dahil sa matatag na demand sa Asia at pagbuti ng benta sa US.

Nanatili ring mataas ang pressure sa gastos dahil patuloy na nagtataas ng presyo ang mga kompanya, na kabilang sa pinakamabilis na pagtaas mula noong huling bahagi ng 2022, ayon sa Japan PMI survey.

Hindi pare-pareho ang naging takbo ng factory activity sa iba pang ekonomiya sa Asia.

Lumago ang aktibidad sa Indonesia at Vietnam, habang bumagal naman ito sa Pilipinas at Malaysia, ayon sa mga survey.